Желіде Шығыс Қазақстан облысы Үржар ауылындағы Бауыржан Момышұлы атындағы мектептің директоры Зауре Сатыбалдинованың оқушыларға ұрсып жатқан аудиосы таралып жатыр.

Аудионы таратқан авторлардың айтуынша, мектеп директоры оқушыларды COVID-19-ға қарсы вакцина алуға мәжбүрлеген көрінеді.

– Сендер өз өздеріңе кедергі жасап отсындар. Ыңғай ауру балалар біздің мектепте ғана бар, сау бала жоқ менде. 51 мектептің 49 мектебі бітіріп тастады. Алып болды. Түгел. Сендер неден қорқып отсындар? Мен сендерді өлімге апаратын менің басым екеу емес. Менде сендерге келер алдыңда ойланып келдім. Екі университет, бір колледж бітірген адаммын мен, – деді Зауре Сатыбалдинова.

Сонымен қатар, директор оқушылардың біріне не үшін вакцина алмайтыны туралы сұрады.

– Шық бері қарай. Атын кім сенің? Не болды? Не бармай жүрсін вакцинаға?, – деп сұрады директор.

Оқушы оған ата-анасының қарсылығына байланыста вакцина алмағанын алға тартты. Баланың жауабына көңілі толмаған директор ұрысып берді.

 – Қазір сөйлесіп, қазір барасыңдар! Бұл не нәрсе? Неден қорқып отсындар сендер? Қол-аяғын, бәрі сау. Басында алғандар өлген жоқ, – деді Сатыбалдинова.

Оқушыларды тізбектеп, вакцина екпесін алуға күштеп, ата-аналарына хабарласуын талап етті.

Оқушылардың бірінің әкесі ауруханада жұмыс істейтінін естіген директор белгісіз біреуге хабарласып, әкесін жұмыстан шығару керек деп қорқытқан.

– Сәлеметсіз бе? Қалыңыз қалай? Сізге хабарласып тұрған Зауре Казеновна. Сізде жедел жәрдем қызметінде С-. жұмыс істейді. Сол кісінің баласы вакцина алмай отыр. Шара қолданыңыз! – деді директор телефон бойынша.

Директор барлық оқушыларға тарих сабағынан кейін, ата-анасымен сөйлесіп, вакцина алуын талап еткен.

https://kaz.orda.kz/sh-o-da-mektep-direktoryny-vakcina-alma-an-o-ushylar-a-rys-an-audiosy-tarady/