Қарағанды облысына қарасты Жаңаарқа ауданының тұрғындары спирттік ішімдектен түбегейлі бас тартпақ. Бастама жалаң сөз емес, іспен дәлелдену үшін 18-жасқа толған азаматтар толығымен тиісті құжатқа қол қояды. Бүгінгі күннің өзінде ауданға қарасты Айнабұлақ ауылының тұрғындары 90%-ы келісімін берген. Бұл туралы Шаңырақ инфо Stan.kz тілшісі хабарлайды.
Спирттік өнімдерді сатуға әрі тұтынуға қарсы шыққан алғашқы өңір – осы Жаңарарқа ауданындағы Айнабұлақ ауылы. Ондағы тұрғындардың басым көбі ішімдікке қарсы екендерін білдіріп, қолын қойып беріпті. Сонымен қатар 1200 тұрғыны бар Талдыбұлақ ауыл тұрғындары да игі бастаманы қуана қолдап отыр. Тиісті шарт бойынша 18 жасқа толған әр азамат тиісті құжатқа қол қойып, арақ-шарапты сатуға қарсы екенін азаматтық тұрғыда білдіруі тиіс. Талдыбұлақ ауылында екі дүкен бір шағын маркет бар. Алдағы уақытта мұнда да ішімдік атаулы сөреден алынады. Керек болса спирттік өнімді сатуға берілген лицензия қайта қайтарылады. Себебі жастар бастаған істі, үлкендер қолдап отыр.
“Ішімдікке жол жоқ акциясы басталғалы бері біз дүкен иелерімен кездесіп, келісімшарт жасап жатырмыз, жұмыс жүріп жатыр. Ішімдікке қарсы акцияны 100% қолдаймыз, жастар болып, ешкім мұны құптайды деп ойламаймын”, – дейді Талдыбұлақ ауылының тұрғыны Мағжан Саяжанов.
“Алкогольден құтылған дұрыс, жастар болашағы үшін. Мен қарсы емеспін, қолдаймын. Ауылда ішетіндер жоқ деуге болады, спиртке тәуелділік жоқ. Ауыл жақсы, жастар салауатты өмір кешіп жатыр”, – дейді тағы бір ауыл тұрғыны Мырзабек Көшкімбек.
Сәке Бермағамбетованың кәсіпкерлік саласында жүргеніне 30 жыл болған. Темекі мен арақтан пайда көл-көсір екенін жақсы біледі. Бірақ пайда ойламай, ар ойлаған ол да өзгелер сияқты ішімдік атаулыдан бас тартқан.
“Баларымыз бүкіл арақты тастап, сындырып, бәрін құртты. Арақты тастаған кездерімізде кірісіміз бірден азайып қалды. Бірақ біз оған қараған жоқпыз, Алла береді дедік. Берді Алла. Қазір шаруашылығымыз, дүкеніміз бар”, – дейді кәсіпкер Сәке Бермағамбетова.
Жаңаарқа ауданында бұл жобаны бастағандар ардагерлер мен аналар кеңесі. Қазір қос кеңес білек сыбанып, бірлесе жұмыс жүргізіп келеді. Спирттік өнімдерден бас тартқан елді мекендер енді той-томалақ пен жиындарда біржола жаңаарқалық қымызға көшуді жоспарлап отыр. Ал келісімді бұзғандарға қарсы заңдық жазалаулар қолданылмайды. Дегенмен ауыл ақсақалдарының кеңесіне салынып, ескерту алуы мүмкін.
“Бастама ретінде бүкіл аудан көлемінде ішімдіктен бас тартып, қолға алып, үгіт-насихат жүргізіп жатырмыз. Ол түсіндірме жұмыстарына байланысты 1-2 ай көлемінде бәрі де осыдан бас тартады деген үміттеміз”, – дейді аудандық ардагерлер кеңесінің мүшесі Мелс Ахмедин.
