Таласта түсіндіру жұмыстары жалғасуда
Талас ауданында «Pfizer» вакцинасы туралы ақпараттарды насихаттау, ата-аналар мен дәрігерлер арасында байланысты қалыптастыру бағытында жұмыстар өз деңгейінде жүргізілуде.
Талас ауданы Қаратау қаласындағы Қаратау құрылыс – техникалық колледжінде білімгерлердің ата-аналарымен 18 жасқа толмаған жасөспірімдерге «Pfizer» вакцинасын егу туралы ауқымды түсіндіру жұмыстары жүргізілді. Аталған жиынға Талас аудандық санитариялық-эпидемиологиялық бақылау басқармасының эпидемиологиялық бақылау және қадағалау бөлімінің басшысы Е.Кенжебаев және Талас аудандық орталық емхана меңгерушісі Г.Каленова қатысты. Балалар үшін жұқпалы аурулардан қорғаудың ең тиімді және кейде жалғыз жолы – вакцинация. Ол балалар мен жасөспірімдерді көптеген аурулардан, ауыр асқынулардан және тіпті өлімнен құтқарады. Аталған жиында мамандар тарапынан екпе салуға қарсы ата-аналарға «Pfizer» вакцинасының маңыздылығы туралы, сондай-ақ, аталған препараттың құрамы мен сақталу ерекшеліктері туралы толыққанды ақпарат жеткізілді. Әрине, ата-ана вакцина десе шошитын жағдайға жетті. Алайда, ауырып ем іздегенше, ауырмаудың жолын қарастыру қажет. Бүгінгі күнге Талас ауданы бойынша 961 адам «Pfizer» вакцинасының 1-компонентін қабылдады. Оның ішінде: 847 жасөспірім, 55 жүкті әйелдер және 59 емізулі ана.
Талас ауданы әкімдігінің баспасөз қызметі.