Бөксесін ары-бері бұлтыңдатып билеген жас жігіт пен қыз тойға келген қонақтарға жақпай қалды. Егде жастағы адамдардың көзінше еш қымсынбаған оларды қолына таяғын ұстаған ақсақал қуып шықты.
Қарияның бұл әрекетін көпшілік қолдап, ұзақ ғұмыр тіледі, деп хабарлайды Шаңырақ инфо Экспресс К. сайтына сілтеме жасап…
Әлеуметтік желіде пайда болған видео көптің қызу талқысына түсті. Онда тойлардың бірінде үлкендердің көзінше еш қымсынбастан бір-біріне жабысып билеген қыз бен жігітті көруге болады. Ырғақты әуенге ілескен олардың бұнысы тойға келген қарияға жақпай қалды. Қолына таяғын сүйенген ақсақал оларды дереу тоқтатып, қуып шықты. Бұл той еліміздің қай өңірінде өткені белгісіз.
Желідегілер қарияны қолдап, соңғы кезде жастардың бейәдеп қылықтарға бейім боп бара жатқанын айтты. Сонымен қатар кейбір тойларды басқаратын ессіз асабалар адам көруге ұялатын сайыстарды ұйымдастырып, намысқа тиетінін алға тартты.
«Осылай құтырып билейтіндерге қой дейтін аталар көп болсын», «Әр тойда осындай бір ата мен апа отырса қанекей», «Қазіргі жастар тойға барса осылай естерін жоғалтып, шайтан боп кетеді. Жөнге келтіріп тұру керек», «Сауап болыпты, түнгі клубта жүрген жоқ қой», «Намысты атамыз шыдай алмаған ғой. Қазақ қызына лайықты би емес. Дұрыс жасады», «Ата қолындағы таяғымен қойып қалу керек еді» деп жазды желі қолданушылары.
Экспресс К бұған дейін мерекелік кеште жерге отыра қап билеген бойжеткен туралы жазды. Онда көңіл көтеруге келген қыздың көйлегі жыртылып, ұятқа қалады.
