Босаға аттаған келінге орамал салу сәтінің видеосы әлеуметтік желіде қызу талқыланып жатыр. Бүгіннің өзінде бейнежазбаны 14 миллионнан астам желі қолданушысы көрген, деп хабарлайды Шаңырақ инфо Экспресс К.сайтына сілтеме жасап…

Видеоны келіннің өзі TikTok парақшасында жариялаған. Онда басына қызыл орамал тағып, той көйлегін киген келін тойхананың еденінде басын төмен қаратып отырады. Ал жанында жеңгелері тұр. Егде жастағы әйел қызыл түсті орамалын шешіп, келіннің басына ақ орамал тағады. Содан соң келіннің екі бетінен сүйеді. Бейнежазбаны көрген желі қолданушылары бұл салт-дәстүрімізге жат нәрсе деп, түсінбей дал болды. Олардың пікірінше, қазақ ешқашан келінді тақыр жерге отырғызбаған. Бұл елдің ойлап тапқан жаңа ырымы.

«Келінді сонша неге бүрістіріп отырғызып қойған?», «Неге отырсыз? Түсінбей тұрмын», «Салтымызда ондай бар ма?», «Неге сонша сүмірейіп отыр?», «Келін иіліп тұруы керек, неге отырғызып қойған?», «Не болды сонша жерге кіріп, көтер басыңды», «Тас ғасыры», «Қайдағы жоқ ырымды жасап отырады», «Ондай салт жоқ. Бұл нағыз мазақ ету», «Қазақ ешқашан келінді тақыр жерге отырғызып немесе тұрғызып бетін ашып, орамал тақпаған. Келінді ақ тулақтың үстінде бетін ашқан», «Нөкерлер ұқсап тұрып алғаны несі?» деп жазды желі қолданушылары.

Пікір қалдырушылар арасында қазақ халқында мұндай салттың барын және ол еліміздің батыс өңірінде кеңінен қолданылатынын алға тартқандар да бар. Айта кетейік, бейнежазба Маңғыстау өңірінде түсірілген екен.

Бүгіннің өзінде көпшіліктің таңданысын тудырған бейнежазбаны 14 миллионнан астам желі қолданушысы көрген. Пікір қалдырғандар арасында шетелдіктер де бар.

Экспресс К бұған дейін жаңа түскен келіннің үстіне ақ мата жауып, арқасынан қойдың өкпесімен ұрғылағандар туралы жазды. Бұдан өзге желі қолданушылары келіннің басына жылқының жүгенін тағып, ары-бері жетектеген ененің әрекетін қызу талқылаған болатын. Сонымен қатар жас келінді үйге терезеден кіргізу сәтінің видеосы әлеуметтік желіде тарап кетті.