Бұл туралы “Қасқа жол” бағдарламасында айтылды.
“Біз театр актері болғандықтан үнемі жинақылықты талап етеді. Үнемі тәртіппен жүру, күш-қуатты бекерге сарқымау керек. Себебі театрда адам мықты болу керек. 500 адамды сендіре алу керек, оның әрқайсысына жақсы көңіл-күй сыйлап, әрқайсысына жақсы энергия беру керек. Ол үшін өзіңнің мықтылығың керек. Сондықтан кез келген ортада салмақты болуға, жақсы жүруге тырысамын”, – деді актер.
Дәурен Серғазин іштегі күйзелісті жеңудің бірнеше жолын айтты.
“Мен ішімдік ішпеймін, бірақ көңілге мас болатын кез болады. Отырыстарда ән айтамын. Содан мас адам секілді, масайып қалғандай сезінемін. Театрда бар күшіңдің салып, уайымды да, басқаны да шығарып аламын. Біздің ең жақсы құралымыз сол театр. Одан бөлек, екі жыл болды, суық суға түсемін. Су адам бойындағы барлық жаман заттарды шығарады. Сумен дәретті де сол үшін алады. Сумен жуынып, өзімді жақсы сезініп қаламын”, –дейді актер.
Театр әртісі кез келген туындыға үш түрлі көзқараспен қарайтынын айтты.
“Мен театрға, киноға спектакльге көрермен ретінде барсам, күлу үшін барам. Көңіл күйімді көтеру үшін барамын. Егер минус іздесем, міндетті түрде табуға болады. Егер жақсы жағын іздесең, оны да табуға болады. Сондықтан әр қойылымнан жақсы нәрсе іздеу керек. Мүмкін, керемет сөйлем есіңде қалар. Немесе автордың бір айтпағы болған шығар дегендей. Ал минус іздеп, сынап отырсаң, ләззат алмайсың. Біріншіден, өнер адамы ретінде, мұсылман ретінде, сосын қазақ ретінде қараймын. Бір киноның қалай түсірілгенін, режиссердің әдісін, мақсатын, жақсы сахналанғанын бағалаймын. Екіншіден, бұл қазаққа тән бе, жат па деп қараймын. Сосын мұсылмандыққа жата ма, бұған рұқсат па деген секілді”, – деді ол.
Актер жаман ұлт болмайды, жаман адам болады деген ұстанымды алға тартты. Қазақ киноларында ұлтымызды келемеж етіп көрсетуге қарсы.
“Жануарға көрсетілген қысым, жаман әрекет, зорлық-зомбылық, ұрлық-қарлық ол қай заманда да болған. Ол қазақта да болған, басқа да болған. Әр ұлт бірнәрсе үшін айыптауға болмайды. Жаман ұлт емес, жаман адам болмайды. Олар кейін де бола береді. Оны қазаққа тықпалаудың керегі жоқ”, – дед Серғазин.
