Бүтін елге бүлінуге жол жоқ!

Күні кеше ғана Тәуелсіздігіміздің 30 жылдығын тойлап, 180 жылдығы қатар аталып өткен Жамбыл бабамыздың «Адамдықты айт, ерлікті айт, батырлықты айт, ел бірлігін сақтаған татулықты айт» деген ұранды сөзімен жылды қорытындылаған едік. Дүниенің түске дейін киіз, түстен кейін мүйіз болып кетуі әп сәтте екен. Барыс жылының алғашқы күндері Маңғыстаудан басталған бейбіт шерудің арты лаңкестердің қитұрқы әрекеттеріне ұласып, елең-алаң күй кештік. Террористік шабуылдың кесірінен материалдық шығыны былай тұрсын, қаншама арыстай азаматтарымыздан айырылып қалдық. Елімізде 10 қаңтар-Жалпыұлттық аза тұту күні болып жарияланып, қабырғаға бататын қазаға ет жүрегіміз езіліп, ел болып қара жамылдық. «Кез келген шығынның орнын толтыруға болғанымен, бірақ адам шығынының орны толмайды» деп батыр Баукең айтпақшы, орны толмас қаза жанымызға қадаудай қатты батты.
Президентіміз Қасым-Жомарт Тоқаевтың жағдайды дер кезінде бағамдап, оң шешім қабылдауының арқасында бейбіт күннің шырқын бұзғандардың басы құрықталып, келтірілген залалдардың орнын толтыруға тапсырмалар жүктеліп, жағдай тұрақталып келеді. Ойсыраған шығынның орнын толтыруға бірлікке жұмылмақ керек. Кешегі Қазбек бабамыздың екі елді елдестірген көрегендігі бүгінгі күнге де керек. «Біз қазақ мал баққан елміз. Ешкімге соқтықпай жай жатқан елміз. Жерімізден құт-береке қашпасын деп, еліміздің шетін жау баспасын деп, найзаға үкі таққан елміз…» демеп пе еді?! Біз бірлікке ұйыссақ, алмайтын қамал жоқ. «Іштен шыққан жау жаман» демекші, бұл жолы жау халық ішінен шықты. Ұлттық рухтың жоғалып бара жатқаны бұл…
Дін мен діл үшін күрескен Алаш қайраткерлерінің ұрпақтарына ұсақталуға жол жоқ! Ұлттық құндылықтарды ұрпақ бойына сіңіртіп, тәрбие мен білімді тел емдіру жолында тер төгіп, күшімізді сарп етуіміз керек. «Болашағымыз» деп айдар тағып отырған жастарымыз білімсіздіктен адасып, түп тамырынан ажырап бара жатқанын тамыршыдай тап басып айтқандар да болды. Ендігі жерден сөзден іске көшу керек-ақ. «Адасқанның айыбы жоқ, қайтып үйірін тапқан соң» деп дана халқымыз айтқандай, адасқандарымызды тура жолға бастап, құрықсыз кеткен жастарымызды тезге салуға ақыл-парасатпен күш жұмсайық.
Елдің бірлігі үшін, жақсы тұрмысы үшін аянбай еңбектену керек. Сүйекке таңба болар істерге бармайық! Қанымызда жоқ қасиетке бой алдырмаған лазым. «Жау жағадан жармасқанда бөрі етектен аладының» керін киіп жүрмелік. Елді дүрліктірген тәжтажал індетінің де ауыздықталмағанын ұмытпайық! Коменданттық сағаттың талаптарына бағынайық! «Тәртіпсіз ел болмайды, тәртіпке бас иген құл болмайды» деген өсиетті өн бойымызға дарытайық!
Ерболат Досымбаев,
ШУ  ауданы, қоғамдық кеңес төрағасы.