Ассалаумағалайкум құрметті бауырлар, қадірлі ағайын!
Адамның кіндік қаны тамып, саналы ғұмыры өткен құтты жер. Отан ата-бабасының мекені, әулетінің терең тамыр жайған киелі өлкесі. Біздер үшін отан оттан ыстық.
Адам баласы туып өскен жері елсіз шөл дала болса да оған бауыр басады. Отанды сүю иманнан. Адам туып-өскен жерінде жаны жай табады. Алыс кетсе сағынып, жау шапса қорғауға, сынаса ашулануға дайын тұрады.
Туған жерін сүю Алла Тағаланың адам болмысына берген асыл қасиеті. Тек тексіз, иманы пәз әрі қасиетсіз бейбақ қана туған жеріне опасыз келеді.
Күні кеше ғана тәуелсіздігіміздің 30 жылдық мерей тойын тойлап, қуанышымыз басылмастан бүгін міне қайғыдан қан жұтып отырмыз. Батыстан басталған бейбіт шерудің арты террорлардың қитұрқы әрекеттеріне ұласып, соның салдарынан қаншама ата-ана бауыр еті балаларынан айырылып, қанша әйел жесір, қанша бала жетім қалды? Сонымен қатар 100 млрд теңге шығынға батырып, халықты зар илетті. Патриотизм сезімі қазіргі күні тек қару көтерумен шектелетін болғаныма? Бір көзі ойылған кісі келіп сенен көмек сұраса асықпа, бәлкім екі көзі соқыр адам келіп сенен көмек сұрауы мүмкін деп үйреткен бабалардың қазіргі ұрпағы неге асығады? Мақсаты не? Малдың да обалы бар, адамның көз жасы жібермейді деп тәрбиелеген ізгілеріміздің сөзі қайда? Жастарымыз соқыр ұранмен не ұтты? Асықпа балам сабырмен шеш деген аналарымыздың ұрпақтары қайда барамыз қайда барып тоқтаймыз?
Елімізде 10 қаңтар жалпыұлттық аза тұту күні деп айтуға оңай болғанымен қаншама жүрек жылап кетті. Қанша отбасы қара жамылды? Енді оның орнын немен толтырмақ? Сан ғасырлар бойы аңсап келген тәуелсіздігіміздің ойранын шығаруға ешкімге жол жоқ. Еліміздің тыныштығын сақтау, оны қорғап қорғаштау барлығымыздың борышымыз. Еліміз аман болса екен, көк туымыз сонау қиямет күніне дейін желбіреп, сол тудың астында мыңдаған ұлт өкілі тату-тәтті өмір сүрсе екен деген ниетіміз айқын болу керек. Сол бағытта біздер аянбай қызмет қылуымыз керек. Бүлік шығару ол адам өлтіргеннен де ауыр күнә. Оған көздеріңіз жетті десем артық айтқан болмаспын. Қайғы жұтқан отбасыларға қайғыра көңіл айтамын. Алла алдарынан жарылқасын. Сабырлы болыңыздар. Бүгін Бас мүфти Наурызбай қажы Тағанұлы хазреттің бастамасымен еліміздегі барлық мешіт қызметкерге сол кісілердің рухына арнайы Хатым Құран бағыштауды үндеді. Ел аман, жұр тыныш болсын. Елім-жерім, отаным деп өсетін жастарымыз көп болғай.
Шу ауданы Төле би мешітінің бас имамы Талғат Кәрібайұлы
