Қазақ қай кезде де «Алтау ала болса, ауыздағы кетеді, төртеу түгел болса, төбедегі келеді» деген өсиетін айтудан жалыққан емес, және сол сөзді басшылыққа алып, жарқын болашаққа беттеп келеді.
Халқымыздың басына нелер келіп, нелер кетпеді?! Қиыншылық деген қиюы келмейтін іс емес. Бұл күндер де артта қалар, тек сабақ ала білу керек.
Жұмыла көтерген жүк жеңіл қашанда… Ата-бабаларымыздың арқа еті арша, борбай еті борша боп жүріп төккен терін зая кетірмей, аманатын ардақ тұтайық!
«Алып-қашпа сөздерде ауыздық болмайды. Сондықтан көрпе астынан ши жүгіртіп отыратын өсекшілер мен асыңды ішіп, бөстегіңді тіліп кететін арызқойларды суқаным сүймейді. Арқасынан аяз өткен кісілер түсінеді. Ондайларға кешіріммен қарауға болмайды» деп Димекең айтпақшы, өскелең ұрпақты жат әдеттерден ада болуға баулиық. «Тектен нәр алған тозбайды» деп дана халқымыз айтпақшы, өткеннен ажырамай, рухани жаңғыруға бет бұруды мықтап қолға алу керек. Бірлікке, татулыққа ұйысқан ұлтымызда іріткі жасаушылардың, бұзақылардың, лаңкестердің соңғы толқыны осы болсын деп тілейік.
«Ақылдан сабыр артық, теңдесі жоқ байлық-қанағат» деген даналықты жадымызға тоқиық. Қандай жағдай болмасын, сабыр сақтап, мейлінше қайырымды болуға ұмтылайық. Елге сенген Президентіміздің салмақты жүгіне арқа тосып, күшіміз-бірлікте екенін дәлелдейік. Адамдық қалыпты биік ұстау кімге де болса үлкен сын. Ілгері басқан аяқты жіпсіз байлайтындар жолымыздан тазартылып, бейбіт елдің берекесін қашыратындар болған іске бармақ тістеп, өкінері ақиқат.
«Бірлігі мықты ел озар» деген тәмсіл текке айтылмаса керек. Бүтін елге бүлік салып, көркейген еліміздің келбетіне жара салған, орасан шығын келтірген бұзақылардың барлығы дерлік құрықталып, жауапқа тартылады. Әлі де босаңсуға болмайды. Мемлекет басшысының мінберде айтылған әр сөзіне ден қойып, талап-тілектерге ел болып бағынайық.
Мырзағали Мадимаров, Байзақ ауданы
