Ескі картадан алынған: Алматылық жалғызбасты ана өз атына алынған 500 мың теңге несиені қайта алмай жүр

Жалғызбасты Айжан Қуатова 8 жылдан бері жұмыс істемейді. Өйткені мүгедек қызына қарайтын жан жоқ. Былтыр өзі үйде болмаған кезде қызына белгісіз біреулер хабарласыпты. Көп ұзамай алаяқтар анасының атына жарты миллион теңге несие рәсімдеп, оны тіпті шешіп үлгерген.

“Маған қағаз шығарып береді. Қағазға қарасам, 500 мың кредит алынған. 477 мың алынған. 20 мың страховкаға қалдырған. Менің үш жыл бұрын істемеген жаңағы карточкамнан алынып отырған кредит. Онлайн алынған”, – дейді Алматы қаласының тұрғыны Айжан Қуатова.

Мамандардың сөзінше, алаяқтар алдаудың түрлі тәсілін ойлап табады. Мәселен, өзін банк қызметкерімін деп таныстырған адам, смартфоныңызға қосымша жүктеуді ұсынады. Сол арқылы ол жеке кабинетіңізге кіреді. Артынша ақшаңызды басқа картаға аударып немесе несие рәсімдейді. Және интернет-банкинг бұзылды деп үшінші тұлға ақшаңызды қолды етпеуі үшін кредит алуға көндіреді. Кейін оны банкоматтан алып, басқа шотқа алдап салдырады.

Азаматтардың көбі алаяқтарға жеке деректерін өздері беріп қояды дейді адвокат.

“Ешкімге ешқандай өзіңіз жайлы мәліметтерді айтпаңыз. Есепшоттың нөмерін айтпаңыз. Карточкаңыздың нөмерін айтпаңыз.  Жоғалтып алсаңыз, полицияға барып дереу арыз жазыңыз”, – дейді адвокат Ғабит Өмірбеков.