Ауғанстаннан эвакуациялау кезінде жоғалып кеткен екі айлық Сохаил Ахмади отбасымен қауышты, деп хабарлайды Stan.kz ақпарат агенттігі Reuters агенттігіне сілтеме жасап.
Сәби өткен жылдың тамыз айында жоғалып кеткен. Ол кезеңде «Талибан» қозғалысы елде бақылау орнатып, мыңдаған адамдар жедел түрде Ауғанстаннан кетуге тырысты.
Әуежайға адамдар обыр-тобыр кіріп жатқандықтан, Сохаилдің ата-анасы сәбиді қақпа арқылы америкалық әскери қызметшіге берген. Әуежайға кіруге талпынған кезде адамдар кептеліп қалған жағдайда сәбиге зияны тимесін деп осындай қадамға барды.
Алайда сәбидің ата-анасы әуежай аумағына кірген соң, кенжесін таба алмай қалды. Сәбиді таба алмаған ерлі-зайыптылар амалсыз үлкен балаларын алып, эвакуациялық рейспен Кабулдан ұшып кеткен.
Баланың әкесі Мырза Әли Ахмади мен оның жары Сурая бірнеше ай бойы оның қайда екенін анықтауға тырысты. Сәби өткен жылдың қараша айында Reuters-те жарияланған ақпараттан кейін табылды. Сәби 29 жастағы кабулдық такси жүргізушісі Хамид Сафидің отбасында тұрып келген.
Хамид Сафи баланы әуежайда жалғыз өзі жылап жатқан жерінен тапқан. Айтуынша, жанында ешкім болмапты. Сәбидің ата-анасын іздеп таба алмағандықтан, Хамид Сафи оны асырап алмақ болып, үйіне әкеледі. Отбасы баланы Мохаммад (Мұхаммед) деп атайды. Хамид Сафидің Facebook-тегі парақшасында оның балалары мен Сохаилдің бірге түскен суреті бар.
Сохаил Сафидің отбасында тұрып жатқаны анықталған соң, Бадахшан елді мекенінде тұратын сәбидің атасы Кабулға аттанған. Ол немересін алып кетпек болғанымен, Хамид Сафи алғашқыда қарсылық білдірген. Сохаилді қайтарудың есесіне өзінің отбасын АҚШ-қа эвакуациялауды талап еткен.
Сохаилдің отбасы мен Хамид Сафидің арасындағы келіссөз жеті аптаға созылды. Ақырында іске «Талибан» полициясы кірісті. Хамид Сафи қысқа мерзімге тұтқындалып, босатылды. Екі отбасы келісіп, бала өткен сенбіде атасына қайтарылды.
Сохаилдің ата-анасы қатты қуанғандарын жеткізді. Олар тез арада ресми әрекеттер аяқталса, Сохаилді өздері қазір тұрып жатқан Мичиганға алып кетуге үміттенеді.
https://stan.kz/auganstannan-evakuaciyalau-kezinde-zhogalgan-eki-aylik-358308/
