Жамбыл облысының әкімі Бердібек Сапарбаевтың төрағалығымен өткен өңірлік жедел штабтың кезекті отырысында бірқатар мәселелер қаралды, деп хабарлайды Arainfo тілшісі.
Аймақ басшысы өңірдегі жағдайдың тұрақталғанын, дегенмен іздестіру шаралары әлі де жалғасып жатқанын жеткізді.
Жамбыл облысында 4-6 қаңтар күні орын алған жаппай тәртіпсіздіктерге қатысқан 2608 күдікті полицияға жеткізілді.
Құқық қорғау органдары тарапынан жүргізілген жедел операциялардың нәтижесінде ұсталғандардың 509-ы әкімшілік жауапкершілікке тартылса (о.і. 175 тұлға 15 тәулікке қамаққа алынса, 52-іне айыппұл салынып, 282-іне ескерту берілген), 52-іне қылмыстық іс қозғалды.
Ұсталғандардан тәркіленген және заңсыз айналымнан алынған қару-жарақтардың саны 161-ге жетті. (Қаруларын ерікті тұрде тапсырып жатқандар да бар).
Оның ішінде 48 «Калашников» автоматы, 13 снайперлі-винтовка, 6 «Сайга» карабин, 23 тапанша, 3 арнайы пулеметтік тапанша, 1 гранатомет РПГ, 1 шағынкалибрлі винтовка, 33 тегіс ұңғылы мылтық және тағы басқалар бар.
Жаппай тәртіпсіздік салдарынан 273 адам түрлі дене жарақаттарын алып, қазіргі таңда оның 22-і ауруханада жатыр.
15 адам қайтыс болды (2-і ПД және ҰҚКД қызметкері, қалғаны бүлікке қатысушылар).
Бүлікшілерді анықтау, құрықтау бойынша құқық қорғау органдарының (Прокуратура, Ұлттық қауіпсіздік, Полиция қызметкерлері) қызметкерлерінен құрылған жедел тергеу топтары тарапынан арнайы жұмыстар жалғасуда.
Қазіргі таңда қоғамдық тәртіпті қамтамасыз ету жұмыстарына облыс бойынша 2016 құқық қорғау органдарының қызметкерлері жұмылдырылған.
