2022 жылдан бастап еліміздегі салық салу саласында бірнеше жаңа өзгерістер пайда болды.
Мемлекеттік кірістер комитеті төрағасының орынбасары Қайрат Миятовтың айтуынша, заңға енген бұл өзгерістер отандық бизнес пен халықты қолдауға бағытталған, деп хабарлайды Экспресс К.
Енді банктер жеке кәсіпкерлер мен заңды тұлғалардың банк шоттарын өздері қалыпқа келтіруге құқылы. Мысалы кейде кәсіпкердің шоты салық төлемегендіктен бұғатталып қалады. Бұрын шотты бұғаттан шығарып, қалпына келтіру үшін Мемлекеттік кірістер комитетінің рұқсаты керек еді, енді оның бәрін банктің өзі жүргізеді. Бастысы — кәсіпкер салық бойынша қарызынан құтылса болды, — деп түсіндірді Қайрат Миятов.
Бұдан бөлек, кәсіпкерлердің банк шоттарын жауып тастауға негіз болатын салық қарызының шегі айқындалды. Бұл 18 мың теңге (6 АЕК).
Яғни кәсіпкердің салық қарызы 18 мың теңгеден көп болмаса, оның банктегі шоты бұғатталып, операциялары тоқтатылмайды. Бұл Салық кодексінің 118-бабында көрсетілген. Аталмыш өзгеріс өткен жылдың шілдесінен бастап жұмыс істейді,
Оның айтуынша, 2022 жылғы 1 қаңтарынан бастап «E-Salyq Вusiness» мобильді қосымшасы негізінде жұмыс істейтін жеке кәсіпкерлер үшін жаңа арнайы салық режимі енгізілді.
Қосымша арқылы жеке кәсіпкер ретінде тіркелуге, салық режимін таңдауға немесе өзгертуге, чек беруге, кірісті есептеп, автоматты түрде қанша салық төлеу керек екенін анықтауға болады,
ЭК салық төлеушілерге арналған бұл мобильді қосымша туралы бұған дейін жан-жақты жазған болатын.
