Қызмет барысында жергілікті тұрғынның үйіне «жағдай білуге келдік» деген Түркістан облысының полицейлері күлкіге қалды. Олардың бұл әрекеті көптің таңданысын тудырды.
Әлеуметтік желілерде қызметтік көлікпен жүрген қос полицейдің түсініксіз әрекетінің видеосы пайда болды, деп хабарлайды Экспресс К.
Facebook-те тарап кеткен бейнежазбадан екі полицейдің жергілікті тұрғынның үйіне келгенін байқауға болады. Тұрғын тікелей эфирде түсірілім жасап тұрғанын байқаған олар дереу күліп, камераны өшіруін сұрайды. Қос полицейдің бірінің есімі — Марат Құрманбеков. Ең қызығы, видеотүсірілім кезінде әйел шенді қызметкерлерден үйіне не үшін келгенін сұрайды. Олар ешқандай себеп жоқ екенін, жай жағдайын білуге келгенін айтады.
Ешқандай себеп жоқ. Жағдайыңызды біліп кетейік дегенбіз ғой. Үйдесіз бе білейік дедік. Үйде екенсіз,
Осы сәтте видеотүсірілім жасап тұрған тұрғын оларға «Үйдемін. Бір жаққа шығу үшін сіздерден сұрауым керек емес шығар», — деп жауап береді.
Видеоны желіге бөліскендердің бірі — Әскер Майданов.
«Не бұл? Мәдениет қайда? Екі қолдары қалталарында, жағасын көтеріп алған. Киімдері алқа-салқа, есі ауысқан адамдай ыржақ-ыржақ күледі. Сұраққа салмақты, дұрыс жауап берсе болмай ма? Офицер деген аты бар емес пе?..», — деп жазды ол.
Бейнежазбаны көрген желі қолданушылары полицейлердің әрекетін түсінбей дал болды.
«Ыржаң-ыржаң етіп күйлеген мысық сияқты», «Қызмет бабымен емес, қырындауға келген сияқты ғой», «Не істеп жүргендерін өздері білмейді», «Базар жоқ, мыналар кәдімгідей қуды ғой», «Не мынау жыртың-жыртың етіп?» деп пікір қалдырды желідегілер.
Айта кетейік, бейнежазбада екі полицейдің мініп келген көлігінің мемлекеттік нөмері Түркістан облысына тиесілі екені байқалады.
Экспресс К тілшісі видеоны Түркістан облыстық Полиция департаментіндегілерге жолдады. Олар полицейлердің кім екенін анықтап жатқанын айтты.
