Қымызды дәміне келтіріп өндеу оңай іс емес. «Бораш» шаруа қожалығының жетекшісі Марат Рахымбеков – жасынан әкесіне ере жүріп, осы жұмысты ұқыптылықпен ойына тоқыған, жетік меңгерген азамат.
«Бораш» – қымыз өндіретін танымал ірі шаруашылық. Қожалықта үш жыл бұрын 37 бие күнделікті қымыз берсе, қазір оның жартысы ғана байланып отыр. Суық болғандықтан қазір қымыз дайындауға оншалық мән берілмейді. Міндет – жылқыны көтерем қылмай, жазға аман жеткізу. Қожалықта Мараттың бүкіл отбасы еңбек етеді. Бие сауатын атшаптырым қораның қасына ертіп келген Мәкең қымыздың қалай дәмді болу керектігін әңгімеледі. Айталық, биелер өлең шөпті көп жесе, қымызы адам асқазанына жайсыз тиіп, кейде іш өтеді екен.
– Жылқышыларым биелерді қар ерігенде шөбі шүйгін алыс жайылымдарға шығарып, сауатын кезде ғана әкеп отырады. Қазір мұнда әзірше жеті биені сауынға ұстап отырмын. Аязды қыста нәрлі шөппен, құнарлы жеммен толық қамтимын. Әсіресе жемге біраз қаржы кетеді. Өз отбасыма, тағы төрт адамға жұмыс беріп отырмын. Сонымен қатар қарындасым Марфуға Сәкенова өз жанұясымен осында істейді. Өзі технолог болып қызмет етуде. 2011 жылы алғаш қожалықты құрғанда осыншалық танымал болады деп ойламаппын. Қазір аудандағы 70-тен аса дүкенмен шарт жасасып, қымызымды таратып отырамын, – дейді Марат Борашұлы.
Шаруашылықта күніне 40 литрден аса қымыз сауылады. Жазда жүз литрге дейін жетеді. Қымыз дәмді болуы үшін оған еш қоспа араластырмайды. Мәкең күбілерін көрсетті. Айналасы тап-таза, саумалының дәмі тіл үйіреді.
Өңір азаматтары осында келіп, саумал, қымыз ішіп, өздерімен бірге алып кетіп отырады. Денсаулығына байланысты келген адамдарға қожалық иесі кейде қымызды ақысыз береді. Шаруашылықта істейтіндер жалақысынан бөлек, керегінше қымыз да алады. Олардың қыстық отын-суын, мал азығын да шаруашылық тегін таратады. Естуімізше, қожалық жетекшісі мерекелік іс-шараларға демеушілік етуден де қашпайды.
Орта бойлы шымыр жігіттің сөз саптауы көпшіл және дархандығын аңғартқандай. Біз Мараттан қожалық туралы, жылқыны қалай күтіп-баптау жөнінде көп нәрсені білдік. Шипалы қымыз дайындау үшін қаншама еңбек етуге, ізденуге, заманға сай оңтайлануға тура келеді екен.
– Қымыз өндіру – күнделікті ісім, – дейді Марат Рахымбеков.
https://didar-gazeti.kz/qymyz-oendirwdi-qolgha-aldy/
