«Үйден ұстап әкетіп жатыр»: Қызылордалық белсенділер полиция тарапынан қысым көріп жатқандарын айтып шағымданды
Қызылорда облысында жаппай тәртіпсіздіктерді ұйымдастырып, митингіге қатысқан деген күдікпен қоғам белсенділері ұсталып жатыр. Бұл жағдай көпшіліктің наразылығын тудыруда. Бұл туралы Stan.kz тілшісі хабарлайды.
Ерік Теңізбаев – Қызылорда облысының тұрғындарына белгілі блогер, қалалық қоғамдық кеңестің белді мүшесі. Өзінің әлеуметтік желідегі парақшасында билікке қатысты сыни пікірлер білдіріп, қоғамның өзекті мәселелерін батыл көтеріп келе жатқан азамат. Белгілі болғандай, тәртіп сақшылары жас жігітті үйінен алып кеткен. Қалалық полиция басқармасына жеткізіліп, тергелген. Бүгінде Ерік Теңізбаев сот үкімінің шешімімен 5 тәулікке қамауға алынды.
«Ерікті үйден алып кетті. Қазір ата-анамыз алаңдап отыр. Інімді іздеп, полиция департаментіне барған болатынмын. Алайда менің өзімді қамауға алды. Ұзақ уақыт тергелдім. Полицейлер түрлі сұрақтар қойды, моральды түрде қысым көрсетілді. Бір тәуліктен астам уақыт қамауда болдым. Осы уақыт ішінде маған және менің қасымда отырған басқа да азаматтарға ас берілмеді. Мен митинг болған күні сауда орталығының алдында болғаным рас. Бірақ мен ешкімді тәртіпсіздік жасауға шақырған жоқпын. Інім Ерік те ешқандай арандатушы емес. Біз митингіге қатысушыларға қарсы заңсыздықтардың болмағанын қаладық. Бұл жерде құзырлы орган мамандарын мен атқаратын қызмет алаңдатады деп ойлаймын», — Қызылорда облыстық тұтынушылар құқығын қорғау қоғамдық ұйымының директоры Серік Теңізбаев.
Серік Теңізбаевтің ісі Қызылорда облыстық әкімшілік сотында қаралған. Алайда сот қоғам белсендісінің әрекетінен ешқандай қылмыс таппай, ақтау үкімін шығарған. Бүгінде Серік Теңізбаевті інісінің жағдайы алаңдатып отыр. Ол жоғары құқық қорғау органдарына шағымдануды жоспарлап отыр.
Қызылордалық қоғам белсендісі Ләззат Бақтыбаеваны да құқық қорғаушылардың заңсыз әрекеттеріне наразы. ҚР Президентінің «Халық алғысы» және ҚР Жоғары сотының төрағасының «Үздік бітімгер» медалдарының иегеріне айыппұл салынған. Ләззат өзіне тағылған айыппен мүлдем келіспейді. Бұл «Шаш ал десе, бас алатындар» өрескел әрекеті деп отыр.
«Қызылордада қоғам белсенділеріне қыспақ жүргізіліп жатыр. Мені үйімнен екі полицей алып кетті. Олар менен халықты араңдатқан адамдар туралы сұраймыз деді. Ақыры соңында өзіме қатысты хаттама толтырып, ісімді әкімшілік сотта қарады. Мен митингі болған жерде көпшіліктен заң бұзбауын, тәртіпті сақтауын шырылдап сұрағандардың бірі болдым. Президентіміз «бейбіт митингіге қатысқандар жазаланбайды» деген. Алайда Сыр өңірінде болып жатқан жағдай адам шошырлық. Сот үкімімен маған 30 АЕК көлемінде айыппұл салынды. Мен бұл шешіммен келіспеймін, аппеляциялық сотқа шағым түсіремін», — дейді қоғам белсендісі.
Аталмыш жағдайларға байланысты Қызылорда облыстық сотынан түсініктеме жасады.
«Бүгінгі күні жаппай тәртіпсіздікке қатысты Қызылорда қаласы бойынша тергеу сотында 49 материал қаралса, әкімшілік құқық бұзушылықтар жөніндегі мамандандырылған сотқа 73 іс түсіп, осы кезге дейін 57 іс бойынша қаулы қабылданды. Ал, облыс орталығынан тыс аудандық соттарға төтенше жағдай режимін бұзуға қатысты 78 әкімшілік құқық бұзушылық туралы іс қаралған. Соттың әрбір шешімі жан-жақты зерделеніп барып қабылданады. Сот процесі кезінде Ерік Теңізбаевтің кінәсі толық дәлелденген. Ол ҚР Әкімшілік кодексі 488 бабының 6 тармағына байланысты 5 тәулікке қамауға алынды. Бүгінде азамат аппеляциялық сотқа шағым түсірген», — деп мәлімдеді облыстық соттың баспасөз хатшысы Ардақ Смағамбетова.
