Панфилов аудандық соты Қытайдан келетін ауыр жүк көліктерін тексерусіз 1000 теңгеден өткізген қазақстандық кеденшіге қатысты үкім шығарды.
Кеденші Алматы облысы бойынша «Нұр жолы» кеден бекетінің бас маманы болып қызмет атқарған, деп хабарлайды Шаңырақ инфо Экспресс К облыстық соттың баспасөз қызметіне сілтеме жасап.
Сот кеденшінің қызметтік бабын пайдалана отырып, Қазақстан аумағына тауарларды әкелумен айналысатын жеке тұлғалардың мүддесін қорғағанын анықтаған, деп жазады informburo.kz сайты.
Жүйелі түрде пара алу үшін кеден бекеті арқылы өтетін көлік құралдарын іс жүзінде қарап-тексермей, еркін өтуіне және жүруіне жеңілдіктер жасаған. 24 жүк көлігінің жүргізушісі кедергісіз өткені үшін «Нұр жолы» бекетінде тұрақты түрде пара берген,
— деп жазылған облыстық сот хабарламасында.
Прокурор кеден қызметкерін тоғыз жылға бас бостандығынан айыруды сұраған. Сотталушы өз кінәсін мойындамады. Сот айыпталушыға параның 70 еселенген сомасында, яғни мүлкін тәркілеусіз 1 680 000 теңге айыппұл салған.
Сондай-ақ Панфилов аудандық соты пара берген 24 жүк көлігінің жүргізушісіне де үкім шығарған.оларға параның 10 еселенген сомасында (әрқайсысына 10 000 мың теңге) айыппұл салынған.
Алайда Тәуелсіздіктің 30 жылдығына орай жарияланған рақымшылыққа байланысты жүргізушілер бұл айыппұлдарды төлеуден босатылған.
