Жамбыл ауданында ағымдағы жылдың қаңтар айынан бастап 205 азаматтан ПЦР тест алынып, оң нәтиже көрсетті. Оның 97-сі симптомды, 102 науқас симптомсыз.
Бұл туралы аудан әкімінің орынбасары Олжас Баққараев айтты. Оның мәліметінше, аурушаңдықтың жоғары деңгейі Полатқосшы, Жамбыл, Аса, Қаратөбе, Қарой, Ақбұлым, Айшабибі, Бесағаш, Қарасу, Қызылқайнар, Гродеково, Қарасу ауылдық округтерінде тіркелген. Ал пневмонияның 8 жағдайы орын алған. Дәрі-дәрмектің 3 айлық қоры бар.
«Екпе егу шаралары туралы айтар болсақ, коронавирус дертіне қарсы 39104 азамат вакцинаның бірінші компонентін, 37877 адам екінші компонентті қабылдаса, ревакцинациялаудан 9416 тұрғын өткен. Ал 12-17 жас аралығындағы жасөспірімдерге, жүкті әйелдерге, бала емізетін аналарға, жасы 60-тан асқан азаматтарға салынатын «Pfizer» вакцинасының өңірге 9480 дозасы жеткізілсе, оның бірінші компонентін 5777 адам, екінші компонентті 2996 азамат салдырған. Екпе егу жұмыстары елді мекендердегі медициналық пунктерде жүргізілуде», — деді ол.
Олжас Елебекұлы жұқпалы аурудың дендеуіне тосқауыл қою мақсатында 2021 жылы 281 рейд жүргізіліп, 802 нысан қамтылғанын атап өтті. Ағымдағы жылы 13 рейдтік іс-шаралар ұйымдастырылып, 27 нысан тексерілген. Зерделеу барысында кәсіпкерлік нысан иелеріне бетпердесіз тұтынушыны қабылдамау, антисептиктік сұйықтықтың болуы, ара-қашықтықтың сақталуы және індетке қарсы вакцина қабылдау қажеттігі түсіндірілуде.
Өңірлік коммуникациялар қызметі
