Бүгін облысымыздың әкімі, қабырғалы саясаткер, ұлт жанашыры Бердібек Сапарбаевтың туған күні.
Осындайда текті халқымыздың: «Жақсының жақсылығын айт, нұры тасысын!», «Бір кісі мың кісіге олжа салады»,-деген терең мағыналы сөздері еріксіз еске оралатыны анық. Сондықтан елім деген ердің еңбегін еселеп жеткізбесем де, екі ауыз сөзге салмақтап жазуды жөн көрдім. Үкімет пен министрліктердегі атқарған басшылық қызметтермен қатар, бүгінде еліміздің бесінші облысын абыроймен басқарып келе жатқанын айтқым келеді.
Жалпы мемлекетсіз ел – жетім ел екенін ескерсек, елдігіміздің ұшар басында Қазақ хандығының тұрғанын естен шығармағанымыз абзал. Ал оның алтын қазығы алғаш рет Әулиеата топырағында қағылғаны біз үшін мәңгі мәртебелі мақтаныш. Ит үріп, керуен көшсе де ерлігін өшірмей, ақпарат пен ақшаның ғасырында тарихтың темірқазығы атанған Тараз шаһарында тәуелсіз елінің болашағы үшін ұлт жанашырларының бастамасымен Жәнібек пен Керей хандарға еңселі ескерткіш орнатылды. Осындағы ұлт жанашырларының ішінде астын сызып ерекше атап өтетін атпал азаматтың бірі, ол – қазіргі облысымыздың әкімі Бердібек Сапарбаев.
Сол кездегі облыс басшысы Кәрім Көкірекбаевқа Үкімет басшысының орынбасары қызметін атқарып жүрген Бердібек Сапарбаев мерейтойды дарақы думан, науқандық шараға айналдырмай, шаһардың батыс қақпасына апарар жолдағы бос жерге ұлтқа өнеге, ұрпаққа үлгі болсын деп Керей мен Жәнібек хандардың еңселі ескерткішін орнату қажеттігін тапсырғаны да есті жұрттың есінде. Төрткүл дүниенің назарын төріне аударған Тараз қаласын абаттандыру жұмыстарына Қазақстанның барлық облыстары атсалысуына да тікелей ықпал еткен де осы Бердібек Машбекұлы болатын.
Мысалы, Маңғыстау облысы «Тараз» қонақүйі маңын абаттандырды, ақ киіз үй стилінде субұрқақ орнатты. Солтүстік Қазақстан облысы автовокзал маңындағы 1,8 гектар саябақты рәсімдеді. Жолына тас төсеп, ағаш отырғызып, субұрқақ орнатты. Алматылықтар бұрынғы орталық базар маңындағы алаңды бедерлі, айшықты сәулет нысандарымен айшықтады. Ол жерде археологиялық қазба жұмыстарынан кейін «ашық аспан астындағы мұражай» салынды. Батыс Қазақстан облысы Қайрат Рысқұлбеков атындағы саябақты абаттандырды. Павлодарлықтар Тәуке хан көшесі бойынша көпір айырықтарын қанатты грифтер, нәзік жақтаулармен ресімдеп, Таразға тосын сый жасады. «Қарахан мавзолейі» ескерткіші маңында «Жасұлан-Флора» компаниясы Қостанай, Қызылорда облыстарының қаржылай қолдауымен аллеяны тарту етті. Осылайша әрбір өңір қазақ мемлекеттілігінің алғаш алтын қазығы қағылған өлкенің ажарын ашып, базарын тасытатын толағай тындырымды істерді жүзеге асырды. Бердібек Машбекұлының киелі Әулиеата жұртына, қасиетті даласына, тағылымды тарихына деген жанашырлығы, құрметі сол кездің өзінде тайға таңба басқандай тыңғылықты бастамаларымен білінген еді. Қазір де өзі осы өңірдің тізгінін ұстап, сол игі істерін қарқынды жалғастырып, нәтижесімен көпшілікті қуантып келеді. Бұл өлкеде бұрын-соңды болмаған тың жобаларды жүзеге асырып, әулиеаталықтардың әлеуетін көтеруге жан аямай қызмет етіп жүр. Кешегі Алаш ардақтысы Әлихан Бөкейхановтың «Ұлтқа қызмет ету – мінезден» дейтін тұғырлы тұжырымы осындай адал, атпал азаматтарға арналғаны анық. Егерде сол сәтте Бердібек Машбекұлы айтулы мерейтойға өзінің тарапынан өзекті ой қосып, қолдау білдірмесе, бес жарым ғасырлық белесіміз бір күндік «іштік-жедіктен» аспай қалар ма еді, кім білсін?! Көзді ашып, еліміздің тыныштығы мен берекесіне, кемел келешегіне кесірін тигізгісі келетін кедергілерді санасақ, оған шашымыз да жетпейтіні белгілі. Дағдарыстан даурықпай, қиындыққа қаймықпай ертеңгі ұрпақтың қамын ойлап ел басқарып жүрген осындай азаматтар халыққа қашанда қажет. Қазақ даласының қай түкпірінде, қандай қызметте жүрсе де Әулиеатаны жүрегінен бір сәт шығармай, Кешегі Керей мен Жәнібектер қаққан қазыққа осы далада бүгін өзі ие болып отырған Бердібек Машбекұлының қазақтың мұзбалақ ақыны Мұқағали Мақатаевпен бір күнде дүниеге келуін де (9 ақпанда) сәйкестік деп айтуға болмас. Бірі:
Ерікті елміз, бүлінбеген қорғаны,
Бәрімізге белгілі ғой ол жағы.
Қайтер дейсің қара бастың толғағы,
Тек жұртымыз күрсінбесе болғаны,-деп халқының жан дүниесін жырмен көмкерсе, енді бірі сол сарынды ілкімді іспен жалғастырып келеді. Бердібек Сапарбаев басқарғалы бері облысымыздың экономика дамуы екінші- үшінші орындардан түскен емес, басқасын айтпағанда «Асарлатып үй салу» бастамасы бойынша екі жылда 233 мұқтаж жандардың сауабын алып баспанамен қамтыды. «Әкім бол, халқыңа жақын бол!»деген қағиданы мықты ұстанған Бердібек Машбекұлы әлі де халық үшін қалтқысыз қызмет етіп, тұрғындардың қуанышын еселей беретініне сенімдімін!
Осы ретте Бердібек Машбекұлын жаңа келіп жеткен ғұмырлық белесімен шын жүректен құттықтап, барша жамбылдықтардың атынан деніне саулық, отбасына амандық тілеймін!
Бердібек Машбекұлы – біз үшін әлі де бергенінен берері көп берекелі әкім, білікті іскер басшы!
Қасымхан Төлендиев, «Жаңару» сыбайлас жемқорлыққа қарсы жалпыұлттық қозғалысы» РҚБ филиалының басшысы
