Бүгін Талас ауданының әкімі Қанатбек Мәдібектің төрағалығымен ауыл шаруашылығы саласын дамыту бағытында шаруа қожалықтары төрағаларымен еркін форматта кеңес өтті.
Аталған кеңеске аудан әкімінің орынбасары Медет Уристенов, ауыл шаруашылығы бөлімінің басшысы Ауданбек Ерубай, ауылдық округ әкімдері, аудандық кәсіпкерлік палатаның директоры Серик Кошкинбаев, аудандық фермерлер одағының төрағасы Берік Қасымов және «Агрохолдинг Талас» АӨШ жетекшісі Ахмедияр Айтбаев қатысты.
Кеңесте көтерілген негізгі мәселелер — ауыл шаруашылығы кооперативтерін құру, балық шаруашылығын дамыту, жаңбырлатып және тамшылатып суару технологияларын енгізу, бал өндіру және сүт өңдеу цехын ашу.
Еркін форматта өткен кеңесте шаруа қожалықтары тарапынан ұтымды ұсыныстар айтылды.
Бүгінгі нарықтық қарым-қатынастар кезеңінде ауыл шаруашылығы саласы таза бизнестің өзі. Бұлай деуіміздің басты себебі, саланың басы-қасында жүрген шаруашылық иелері ең алдымен табыс табуы қажет.Олар саланың өздері ыңғайлы деп тапқан түрін өндірістік жолға қою арқылы тұрғындарға жұмыс орындарын тауып берсе, нұр үстіне нұр! Мұның ар жағында азық-түлік қауіпсіздігін қамтамасыз етуі мен еліміздің салықтық әлеуетін көтеруге қосылатын үлес те бар.
Соның бәрі тұтаса келгенде, ел бесігі аталған ауылдарда табыстың жаңа тасқыны пайда болуына әсер етпек. Бүгінгі кеңестің басты мақсатының бірі де ауыл еңбеккерлерін пайдасы мол іске жұмылдыру болып табылады.
Талас ауданы әкімдігінің баспасөз қызметі
