Жамбыл облысының 48 жастағы тұрғыны өз үйінде жарты центнерден астам есірткі сақтаған деп жазды Шаңырақ инфо Polisia.kz сайтына сілтеме жасап.
16 ақпанда Жамбыл облысы ПД Есірткі қылмысына қарсы іс-қимыл басқармасының қызметкерлері жедел-іздестіру іс-шараларын жүргізу барысында Шу ауданының тұрғынын ұстады.
Күдікті үйінің аумағын тінту кезінде ауладағы сейфтен қап пен 3 полиэтилен пакет алынды. Олардың ішінде өзіне тән өткір иісті ұсақталған өсімдік тәріздес заттар болған. Сондай-ақ орылған шөптің арасынан каннабисті ұсақтайтын елек табылды.
«Сот-химиялық сараптама нәтижелеріне сәйкес, тәркіленген есірткі заттарының гашиш (16 келі 190 грамм) және марихуана (39 келі 870 грамм) екені анықталды. Ұсталған азамат өз кінәсін толық мойындады. Қазір Қылмыстық кодекстің 296-бабының 4-бөлігі бойынша сотқа дейінгі тергеу амалдары жүргізілуде. Оған қатысты есірткі заттарын аса ірі мөлшерде сақтағаны үшін 3 жылдан 7 жылға дейінгі мерзімге бас бостандығынан айыру жазасы көзделген», – деп хабарлады облыстық ПД бастығының орынбасары Нұржан Рахметуллаев.
https://turkystan.kz/article/168389-zhambylda-uyinde-60-kelige-zhuyk-esirtki-saktagan-er-adam-ustaldy-video/
