Әр азаматтың бір-біріне құрмет білдіретін күні. Көк­темнің ал­ғаш­қы мерекесі, атаулы күн – мейі­рімділіктің, бүкіл қазақ­стандық­тың бір-біріне деген дос­тығы мен ыстық ықыласының жарқын символы.

Әлемде де мұндай алғыс айтып, ризашылығын білдіретін күндер бар. Кейбір аңыз деректерге сү­йен­сек, Америка құрлығына келген отарлау­шылар 1621 жылы қаһарлы қыстың құрсауында қалып, аштыққа ұшы­райды. Сонда жергілікті үндістер аяушылық танытып, тамақтан­дыр­ған екен. Мұны өзгелер де қос­тап, бүкіл дүйім жұрттың қа­һарлы қыстан аман-есен шығуына себепкер болған деседі. Сол кезден бастап бұл күн аман-есен қал­ған­дары үшін Жаратқанға құлшылық ету және көмек қолын созғандарға Ризашылық білдіру күні ретінде аталып өтеді. 1789 жылы Джордж Вашингтон ризашылық білдіру күнін «Ұлттық мереке» деп жа­рия­лаған. Бұл мереке бүгінде мемлекет деңгейінде, әр отбасында атап өті­леді. Дәстүрлі тағамдар дайын­далып, міндетті түрде дастарқанға күркетауық қойылады екен. Осы­лайша, ризашылығын білдіріп, аштықтан аман сақтап қалған елге алғыс айтады. Вьетнам мен Қы­тайдың кейбір өңірлерінде 8-ай күнтізбесінің 15-күнінде (күз мез­гілінің орта тұсы) ризашылық фес­­тивалі (Tet Trung Thu) өткі­зі­леді. Мереке астық жинауға арна­лып, халық жаңбыр жауғызып, мол астық алуға жағдай тудырғаны үшін Айдаһарға алғыс айтатын көрінеді.

Мың алғыс сендерге!

«Бұл айтулы мереке қазір елі­мізде кең көлемде тойлануда. Өт­кен ғасырдың 30-жылдарында қа­зақ жеріне Батыс пен Шығыстан жүздеген ұлт жер аударылды. Дәл бүгінгі күн репрессияның қиын жыл­дарында өзге этностарды жы­лы қабылдап, кең құшағына сый­ғыза білген қазақ халқына үлкен ризашылығымызды білдіретін күн», – дейді Жамбыл облыстық Махмұт Қашқари атындағы Ұйғыр этномәдени бірлестігінің төрайы­мы Мухабат Турдыева.

Оның айтуынша, Алғыс айту күні – бұл, ең алдымен елімізде тыныштық пен үндестік, өзара сенімділік пен барлық қазақстан­дықтарға деген құрметтің орнығуы. «Тағдыр тәлкегімен Қазақстан жеріне еріксіз қоныс аударған түрлі этностардың миллиондаған өкілдері құтты қонысына айналған қасиетті қазақ жеріне, елге алғыс айтады. Қазақ халқы қиын-қыстау заманда олардың басына түскен ауыртпалықты қайыспай бірге кө­тере білді. Сол үшін қазақ халқына мың тағзым.

Негізі, адамзат бір-біріне алғыс айтып, ризашылығын білдіріп жү­ретін болса, соғыс атауы болмас еді. «Адамзаттың бәрін сүй бауы­рым деп» деп дана Абай айтқандай, бірліктің кілті – татулықта екенін түсінеміз.

Сонымен қатар бірлігімізді одан әрі сақтау үшін мемлекеттік тілдің айналасында шоғырла­нуы­мыз қажет. Мұны Қазақстан Пре­зиденті Қасым-Жомарт Тоқаевтың қазақ тілінің рөлін күшейту және оның ұлтаралық қатынас тіліне айналуы туралы айтқан сөзінен терең ұғындық», – дейді Турдыева.

Елімізде оттың орта­сында жүретін мамандық иелері бар. Олар – өрт сөндірушілер. Өртке қарсы қызмет қызметкерле­рі күн сайын өртпен, апатпен бетпе-бет келеді және басқаларды құтқару үшін өмірін қатерге тігеді. Олардың жеделділігі, кәсібилігі және қа­ра­пайым адамгершілік қасиеттері үшін алғысхаттар жиі келеді.

Мереке қарсаңында Қарағанды облысы ТЖД Өрт сөндіру және авариялық-құтқару жұмыстары қызметіне Сортировочный стан­сасының тұрғыны арнайы алғысын білдірді. Дарья Геннадьевна өз хатында 2022 жылдың 22 ақпанда өртті сөндірген өрт сөндірушілерге алғыс айтқан.

Желтоқсанның 22-і күні Сор­тировочная стансасында үйлердің бірінде өрт шығады. Оқиға орнына келген №12 өрт сөндіру бөлімінің өрт сөндірушілері үйдің жанып жатқанын байқады. 3-ші қарауыл жеке құрамының сауатты іс-әре­кетінің арқасында өрттің алдын алып, қауіптің бетін бері қай­тарады.

«№12 өрт сөндіру бөлімінің №3 қарауылының өрт сөндірушілері өртті тез сөндіріп қана қоймай, бізді моральдық тұрғыдан қолдады. Өмірдің осындай қиын сәттерінде бізге қолдау мен жылы сөздер ке­рек. Сондықтан Қарағанды қала­сының №12 өрт сөндіру бөлімінің жеке құрамына алғысымызды жариялауларыңызды өтінеміз. Өрт сөндірушілердің жедел және үйлесімді әрекеттерінің арқасында үйімізді, мүліктің көп бөлігін өрт­тен сақтап қалдық. Мың алғыс!» делінген алғысхатта.

Берекенің кілті – бірлікте

Мереке қарсаңында Ішкі істер министрлігі қызметкерлеріне, яғни полицейлерге де алғыс айтып жатқан жандар бар. Мәселен, Түркістан облысының тұрғыны На­сиба Файзуллаева Келес АПБ-на және Көші-қон қызмет тобы­ның қызметкерлеріне інісінің құ­жатын аз уақыт ішінде жасап бер­гені үшін шынайы ризашылы­ғын жеткізді. Нақтырақ айтсақ, Насиб Файзуллин туылғалы бері қызыл паспортпен жүріп, ҚР аза­маттығын алмаған. Сондықтан аза­маттығын алу үшін Көші-қон қызмет тобының инспекторы, по­лиция майоры Нұржан Қилы­баев­қа арызданып, өтініш білдірген. Полиция майоры Нұржан, тез ара­да Н.Файзуллиннің азамат­ты­ғын анықтап, форма 5 құжатын ҚР азаматтығын алу үшін дайындап берген. Көші-қон қызметкері Н.Қи­лыбаевқа Шынайдар Бижі­гітұлы да өзінің ақжарма тілегін айтып, жұмысына табыс тіледі. Оның айтуынша, әкесі Абай ауы­лының тұрғыны Бижігіт Медетов бұрынғы құжатын жоғалтып алып, салдарынан ҚР азаматтығын ал­май жүре берген. Осы жылы поли­цейлердің көмегіне жүгініп, құжа­тын заңдастырып алған. Өз кезе­гінде тұрғын: «Әкемді ары-бері сан­далтпай, жылдам құжаттарын жинақтап, реттеп берген поли­цей­ге рақмет айтамыз!» деп риза­шылығын жеткізді.

Сайрам ауданы Манкент ауыл­дық округі қоғамдық кеңесінің төрағасы Эшметов Абдулла Сайди­каримұлы, Сайрам ауданы Поли­ция басқармасы қызметкерлерінің жұмыстарын жоғары бағалап, алғысын білдірді. Жергілікті тұр­ғын сөзінде «мен аудан тұрғын­дары атынан өңіріміздің поли­цейлеріне алғысымды айтамын. Олардың күндіз-түні атқарып жат­қан жұмыстарының арқасында қылмыс азайып, халық тыныш өмір сүруде…», – дейді.

Ақ халатты абзал жандарға алғысым шексіз!

Пандемия кезінде көп жүк дәрігерлердің иығына артылды. Өлім мен өмірдің арасында арпа­лысқан талай азамат дәрігерлердің арқасында ковидті жеңіп шықты. Коронавирус екі өкпеден қысып, ауа жұта алмай қиналған қаншама жанға дәрігер шипа берді. Сондай-ақ елімізде өзгенің ағзасын салып, қалыпты өмірге қайта оралғандар да аз емес. Солардың бірі –Қызылорда өңірінің тумасы Жазира Сейсенбаева. Ол 2011 жылы сәуір айында бауыр церрозымен ауырған. Диагнозын жарты жылдан кейін ғана Таш­кент­те тапқан екен. Асқынғаны сон­дай, 2016 жылға дейін бауыр жа­сушаларын ауыстыру үшін мез­гіл-мезгіл Шымкент және астана қалаларында ауруханада жатуға мәжбүр болған. Ұдайы дене қызуы көтеріліп, бойының бәрін ісік ба­сып, су толып кеткен. Осы жылдан бастап бауыр ауыстырмаса болмай­тыны белгілі болып, донор іздей­тін­дердің күту парақшасына тізім­ге енгізілген.

«2016 жылы наурыздың 9-ында ес-түссіз ауруханада жатқа­ным­да дәрігерлер «болды енді қош­таса беріңдер, донор табыл­мауына байланысты сіз­дерді үйге қайтарамыз» деген. Ата-анам 10 нау­рызға сағат 10.00-ге билет алған бо­латын. Сол күні таңертең жина­лып жатқанда, донор табылды де­ген хабар келді. Бір есімді жина­сам, ата-анам солай деп қуанып отыр. Бірақ бұған дейін екі рет туыс­қандары рұқсат бермей, бас тарт­қан­дық­тан, екі операция жа­салмай қал­ған болатын. Сондық­тан да мен бұл хабарға ол жолы да қатты сен­ген жоқпын. Үмітімді үзіп, та­­лықсып кеттім. Бір көзімді аш­сам, операциялық блок деген жазудан өтіп барады екенмін. Одан соң бір аптадан кейін ғана жаңа бауырмен бір-ақ ояндым. Аллаға алғысым шексіз! Ақ ха­латты абзал жандарға алғысым шексіз! Транс­плантолог-хирург Мәрлен Ақмыр­заұлына, емдеуші дәрігерлерім Мылтықбай Сағын­бекұлы, Ахмет Машрапұлдарына зор алғыс!», – дейді репициент Жазира Сей­сенбаева.

Адам баласын рухани байы­татын тұлға, аяулы ұстаздарға да айтар алғысымыз шексіз! Олар ерек­ше азаматтық миссияны орын­­дайды. Елдің болашағы – жастарға жол сілтейді.Сондай-ақ от пен өрттің ортасында жүрген өрт сөндірушілерге, Отан қор­ғау­шы азаматтарға, ел қауіпсіздігін күзететін тыныштық күзетші­ле­рі­не, дәрігерлерге, барша қазақ­стан­дықтарға мың алғыс!

Айым БЕКТҰР

https://aikyn.kz/186106/algys-degen-el-syyy/