Аталған видеоны Санжар Керімбай жүктеді, деп хабарлайды Caravan.kz медиа порталы.  Онда жаздың күні ауыл балаларын жинап алып ән айтып отырған жігітті және қатар-қатар жатқан балаларды көруге болады.

«Пандемия темасына оралайық.
Сонымен бүкіл әулеттен маза қашты. Көпқабатты үйдің қуыс-қуыс пәтерінде смартфонға байланып отырып қалған бала-шаға мәдени тұрғыда деградацияға ұшырады. «Бұларда музыкалық талғам нөл! Бұлардың жасында біз ең болмағанда Шәмшінің өлеңдерін сүйсіне тыңдап, шабыттана шырқаушы едік. Бұлар қазір Шәмші тұрмақ Абайды танымайды. Слухтарын піл таптап кеткен. Жоқтан өзгені талғамай тыңдай береді. Мынау катастрофа болды!» деп жеңгелерім де дабыл қақты. Шәнжархан ғана сасқан жоқ. Қорықпай Пандемиямен жекпе-жек шықтым. Негізгі сенген қаруым Яссауидің хикметтері. Соны жаттатып, Һу-Һу деп сұңқылдатсам бір кәрәматтың боларына кәміл сенем. Себебі қазақтың бейсанасында шөгіп жатқан рухани архетиптің бәрі Яссауидің хикметімен қайта тіріледі. Хан да, би де, батыр да Әзірет Сұлтанның басында жатыр. Қожа Ахметтің рухы айқын санаға әсер еткенде қазақ сахарасын рухани реңге бөлеген бүкіл ірі қазақтың әруағы қоса тіріледі. Осыдан соң іс алға басады.

Классикалық әуен тыңдаса тыжырынып қалатын бала-шағаның бәрі бейне бір 19 ғасырға өтіп кеткендей әсерге бөленеді. Абай олар үшін замандас абыз сияқты қабылданады. Күні кеше өліп тыңдап, талып сүйген жындыбас әртістерін арқасынан қағып шығарып салды. Арада он күн өтер өтпесте олар домбырамен классиккалық бір ән тыңдамаса ұйықтай алмайтын «ауруға» шалдықты.
Ал, әншіні аттай қалап арқаның жерінен, Қарқаралының тап өзінен алдырдым. Балалар өмірінде өздерін бұлай бақытты сезінбеген шығар?! Осылайша пандемия пақырдың бүкіл күші зая кетті. Ол қанша жерден тырысса да бізді біржола телефонға жығып бере алмады. Бәлкім кім білсін, егер пандемия болмағанда біз де бұлай жаппай жиналып, қорықпай әрекет етіп, мәдени қорғанысты нығайтпас па едік? Не де болса Абайдың әдемі әндері бала-шағаның құлағына әбден сіңді. Енді олар парықсыз музыка тыңдап тұрған сыныптағы құрдасына қарап бір заманда өзінің де қаншалықты рухани құлдырап кеткенін анық байқайтын хәлге жетті. Абай рухы мен Абай әні оларды басқа ғаламның да қызығын көруге жол ашты»,- деп жазды Санжар Керімбай.

ВИДЕО мына сілтемеде:  https://www.instagram.com/p/CZsDh87qfiU/