«Алматыда естен кетпес 5 жылды өткіздім. Әйеліммен сонда таныстым, бірінші балам сонда дүниеге келді»

Футзалдан Ресей құрамасының бұрынғы ойыншысы Густаво Prosports.kz сайтына берген сұхбатында «Қайрат», Қазақстан құрамасы және ҚФФ президенті сайлауы туралы айтты.

– Густаво, мансабыңызды аяқтағаныңызға бірнеше жыл болды, қазір «Ростовты» жаттықтырып жүрсіз. Ойыншы кезіңізді сағындыңыз ба?

– Иә, 2018 жылы мансабымды аяқтап, 2020 жылы «Ростовты» жаттықтыра бастадым. Негізінде, мен футболшы ретіндегі мансабымды сағынбаймын. Мен мансап жолыма толықтай қанағаттанамын. Сол үшін жаттықтырушылық қызметке алаңсыз ауыстым.

– «Қайраттағы» кезеңді еске түсірейік. Ол кезде клуб қандай еді?

– Мен келгенде клубтың өз базасы да жоқ еді. Қазақстанда футзал енді қалыптасып жатқан, бірақ біз оны дамытуға деген үлкен ниет пен жігерді көрдік. Мұнда ерте ме, кеш пе үлкен жеңістер болатынын білдік. Шын мәнінде солай болды.

– Сол кезең есіңізде не қалды? Сол кезде «Қайрат» сапындағы ойыншылардан кімдер есіңізде?

– Ол кезде Какау, Вагиньо, Пика Пау сияқты бразилиялық ойыншылар көп болды. Сондай-ақ Виталий Бутрин болды, онымен әлі күнге дейін жақсы қарым-қатынастамын.

– «Қайраттағы» 5 жыл мансап жолыңызға қалай әсер етті?

– Бұл өте маңызды кезең болды. Ол кезде мен мансабымды енді бастаған едім, «Қайрат» үшін бұл кезең тек бастамасы болатын. Маған қала бірден ұнады, әйеліммен Алматыда таныстым, бірінші балам осында дүниеге келді. Осы 5 жыл мен үшін ұмытылмас жыл болды.

– «Қайраттан» кейін «Сибиряк» сапына ауысып, Ресей төлқұжатын алдыңыз. Ал 2013 жылы әлемнің үздік қақпашысы атандыңыз. Бұл жетістікке жетудегі ең маңызды фактор не болды?

—  «Қайратпен» келісімшартым аяқталғаннан кейін Ресейден ұсыныс түсіп, өзімді сонда сынап көргім келді. Бірінші маусымнан-ақ азаматтық алуға мүмкіндік туды, 6 айдан кейін ұлттық құрамада ойнай бастадым. Әлемнің ең үздік қақпашысы атағы жайлы айтатын болсақ, кез келген ойыншы үшін мұндай сыйлықты алу маңызды. Қазір бұл жүлде мен үшін естелік болып қалды және бұған өте қуаныштымын. 2013 жыл Ресей құрамасы алға қадам басқан жыл болды, «Динамомен» де көптеген жүлде жеңіп алдық.

– Қазір «Қайратты» қадағалап отырасыз ба? Олардың қазіргі деңгейі туралы не айта аласыз?

— Мен «Қайратты» үнемі бақылап отырамын, Игитамен, Кака бапкерімен қарым-қатынасым бар. «Қайрат» Еуропаның үздік командасы. Чемпионатта 3-4 легионері бар басқа да жақсы командалардың барын көріп отырмыз. Сонда да «Қайрат» бірінші орынды ұстап тұр, бұл оңай емес.

– Қазақстан құрамасының ірі турнирлердегі матчтарын тамашалайтын шығарсыз. Біздің командаға қандай баға берер едіңіз?

— Әрине, көремін, атап айтқанда Еуропа чемпионатының матчтарын көрдім. Барлығымыз Қазақстан жартылай финалға шығады деп күткен едік. Украинадан өтуге болатын еді, бірақ олай болмады. Бірақ мынаны қосқым келеді, қазір құрамада тамаша ойыншылар бар, тек легионерлер ғана емес, қазақстандықтар да жақсы ойнап жүр. Сондықтан Қазақстан қазір Еуропадағы жетекші командалардың бірі.

– Қазақстандық ойыншылардан кімді атай аласыз? Кімнің Еуропада ойнауға мүмкіндігі бар?

– Жоғарыда айтқанымдай, жақсы ойыншылар көп. Маған Ақбалықов қатты ұнайды. Ол өте жақсы ойнады. Оны Қазақстан құрамасының болашағы деп ойлаймын.

— Қайрат Оразбековтың футзалда осындай табысқа жетуіне не себеп болды?

— Бразилиядан жаңа ғана келіп, Қайрат Оразбековпен кездескенде бұл кісінің футзалды өте жақсы көретінін түсіндім. Сол кезде де оның арманы УЕФА кубогын жеңіп алу болатын. Елестете аласыз ба! Ол кезде ештеңе жоқ еді, бәрі енді ғана басталған, Қазақстан үлкен турнирлерде өнер көрсетпеген, «Қайрат» Еуропада өнер көрсетпеген, бірақ бәрібір олардың алдында осындай үлкен мақсат болды. Ақырында оның бәрі жүзеге асты.

— Жақында ҚФФ президенті сайлауы өтті, Оразбеков бұл лауазымға үміткерлердің бірі болды. Қалай ойлайсыз, егер ол жеңсе, біздің футбол қандай жетістікке жетуі мүмкін еді?

– Иә, ол туралы оқыдым. Оның президент болмағаны өкінішті. Менің ойымша, егер ол сайланса, Қазақстан футболы футзалдағыдай жетістікке жетер еді.

https://prosports.kz/kz/news/540770-almatyda-esten-ketpes-5-zhyldy-otkizdim-eielimmen-sonda-tanystym-birinshi-balam-sonda-duniege-keldi