Бүгін «Grand bazaar» сауда орталығының алаңында «Қош келдің — Әз Наурыз!» атты мерекелік ауыл шаруашылығы өнімдерінің жәрмеңкесі өтті.
Жыл басы Наурыз мерекесіне орай өткізілген жәрмеңкеде Қордай, Мойынқұм, Жамбыл, Т.Рысқұлов, Байзақ, Жуалы, Меркі, Шу аудандары мен Тараз қаласының шаруалары 110 тоннаға жуық өз өнімдерін нарық бағасынан төмен бағада ұсынды.
Оның ішінде 15,2 тонна ет (жылқы, сиыр, қой және тауық еті), 3,5 тонна шұжық өнімдері, 5,3 тонна сүт өнімдері, 6 мың дана жұмыртқа, 0,5 тонна кондитерлік өнімдер мен 3,4 тонна макарон өнімдері, 2,6 тонна балық, 2,0 тонна ұн, 2,6 тонна бал және 74,6 тонна жеміс-жидек пен көкөніс өнімдері бар.
Жәрмеңкеге арнайы келген облыс әкімінің орынбасары Нұржан Нұржігітов сөрелерді аралап көріп, тауарлардың сапасы мен қойылған бағалардың тұрақтылығын бақылады және шаруалармен тілдесіп, ұсыныс-тілектеріне құлақ асты.
Сонымен қатар, «Grand bazaar» сауда орталығының алаңында ұйымдастырылған мерекелік шараға қатысып, облыс қонақтары мен қала тұрғындарын Наурыз мерекесімен құттықтады.
Жалпы жәрмеңке барысында ауыл шаруашылығы өнімдерінен бөлек келушілерге концертттік бағдарлама мен танымдық қойылымдар көрсетіліп, мерекеге орай әзірленген арнайы орындарда ұлттық тағамдардан дәм ұсынылды. Сонымен бірге, шекем тас, қол күрес, ханталапай, асық ату, тоғызқұмалақ, арқан тарту, орамал тастамақ, ләңгі тебу сияқты ұлттық ойындар ұйымдастырылды.
Жәрмеңке соңында мерекелік шараға қатысқан аудандық өнерпаздарға арнайы алғыс хат табысталып, ұлттық спорттық ойындардың жеңімпаздары дипломдармен марапатталды.
Қолжетімді бағаға азық-түлік алып, мерекелік жәрмеңкеге көңілдері толған шаһар тұрғындары ұйымдастырушыларға алғыстарын айтып, ризашылықтарын білдірді.
Жамбыл облысы әкімдігінің ауыл шаруашылығы басқармасы
