✅ Тараз қаласындағы Ж.Үшкемпіров атындағы «Тараз-Арена» спорт сарайында мемлекеттік әйел қызметшілері арасындағы жекеленген спорт түрлерінен ұйымдастырылған облыстық спартакиадада жүлдемен оралған бір топ мемлекеттік әйел қызметшілерді мереке қарсаңында аудан әкімі Бақыт Қазанбасов қабылдады.
✅ Үстіміздегі жылдың 4 наурызында Тараз қаласындағы Ж.Үшкемпіров атындағы «Тараз-Арена» спорт сарайында Қазақстан Республикасы Мемлекеттік қызмет істері агенттігінің Жамбыл облысы бойынша департаменті және облыс әкімдігінің дене шынықтыру және спорт басқармасымен бірлесе 8 наурыз – Халықаралық әйелдер күніне арналған мемлекеттік әйел қызметшілері арасындағы жекеленген спорт түрлерінен (үстел теннисі, жүзу, жеңіл атлетика, секірмек, шекемтас, дойбы, дартс) облыстық спартакиада ұйымдастырылған болатын. Аталған жарыста облыс орталығы Тараз қаласы мен аудандардан 23 команда өз бақтарын сынап, байзақтық қыз-келіншектер аудан намысын абыроймен қорғады. Атап айтар болсақ, шекемтастан өткен жарыста аудан әкімдігінің сәулет, қалақұрылысы және құрылыс бөлімінің бас маманы Салтанат Тұрғынбаева қарсылас шақ келтірмей алтын медальға ие болса, Бурыл ауылдық округі әкімі аппаратының бас маманы Бағлан Сатенова күміс жүлдені қанжығасына байлады. Ал, Қостөбе ауылдық округі әкімі аппаратының бас маманы Земфира Зулуф-оглы елу метр қашықтыққа суда жүзуден алдына жан салмай, алтын жүлдеге ие болды. Жалпы, командалық есеп бойынша жүлделі бірінші орын қазынашалық департаментіне, екінші орын Байзақ ауданы әкімдігіне және үшінші орын Шу ауданы әкімдігіне бұйырды.
Жеңімпаздарды құттықтаған Бақыт Алпысбайұлы аудан спортшыларына жан жақты қолдаулар көрсету алдағы уақытта да өз жалғасын табатынын жеткізіп, жүрекжарды лебізін арнап, гүл шоқтары мен сыйлықтар табыс етті. Қабылдау барысында аудан әкімінің орынбасары Дәуір Дәулетов, аудан әкімдігі дене шынықтыру және спорт бөлімінің басшысы Ерік Мамадияров, спартакиада жүлдегерлері атынан Бағлан Сатенова сөз сөйледі.
✅ Кездесу соңы естелік суретке түсуге ұласты.
Байзақ ауданы әкімдігінің баспасөз қызметі
