Жолдау-2022
Мемлекет басшысы Қасым-Жомарт Тоқаевтың бүгін жолдаған Жолдауында көптің көкейінде жүрген көптеген мәселелер айтылды. «Қаңтар қасіреті» туралы да сөз қозғалып, еліміздің бүтіндігі мен тұтастығы ең қымбат қазына екені айтылды.
Иә, бізге қазіргі таңда ел бірлігі мен ынтымағын, тыныштығын берік ұстауымыз қажет. Ұрпақ тәрбиесіне де бей-жай қарамай, еліміздің ертеңі саналатын саналы жастар қалыптастырғанымыз абзал. Тәуелсіз еліміздің гүлденуі мен дамуына барша азамат атсалысып, өзіндік үлесін қосуы тиіс. Яғни, Жаңа Қазақстанды құруды өзімізден бастағанымыз жөн.
Президент Жолдауда ұсынған реформаның негізгі мәні — билік пен халық арасында нақты нәтиже беріп, қордаланған мәселелердің жүйелі шешімін табуына арқау болатын, екіжақты тиімді диалог ұйымдастыру.
Мемлекет басшысы өз Жолдауында депутаттар корпусы, олардың жұмысы жайлы сөз қозғады. Президент айтқандай, әр депутат халықпен етене байланыс орнатып, өз белсенділігін танытуы керек. Сенім артылып, халық қалаулысы болып сайланған соң, берген уәденің үдесінен шығып, депутаттық мандатын абыроймен атқарғаны дұрыс. Жолдауда «егер де депутатты халық танымай, ол берген уәдесінде тұра алмаса, онда оның мандаты кері алынады» деп айтылды. Бұл оймен келісемін. Жұмысты дұрыс үйлестіре алмайтын, уәдесін орындай алмайтын депутаттың орнына белсенді, жанашыр азамат табылатыны сөзсіз.
Сонымен қатар, Президент «Бұқаралық ақпарат құралдары бәсекеге қабілетті және еркін болуы керек. Бұл қағидат қазір кез келген өркениетті ел үшін айрықша маңызды» деп атап өтті. Бұқаралық ақпарат құралдары тұрғындарға ақпаратты бүкпесіз жеткізіп, ел мүддесі үшін еңбек етуі керек. Журналистер қауымын Төртінші билік деп атап өтіп, олардың мәртебесін көтеру керек екенін айтты. Бұл заңдылық. Өйткені, кез келген БАҚ өкілдері мемлекет пен халық арасындағы алтын көпір. Бұл салаға да аса мән беріліп, БАҚ туралы Заңды қайта қарау қажеттігін айтқаны көңілден шықты.
Ең бастысы, Жолдауда ұлттық құндылықтарымыздың ұлықталғаны қуантты. Президент ел аумағындағы облыстардың қатарын көбейтіп, оларға тарихи атаулардың берілуі дұрыс шешім. Көпшіліктің ойындағы жүрген түйіткілді мәселелердің шешілуі деп білеміз. Тарихымыздың ұлықталып, ұлы тұлғалардың насихатталғаны тарихты жоғары бағалағаны деп білемін.
Міне, тұтастай алғанда Мемлекет басшысының бұл Жолдауы Жаңа Қазақстанды құруға бағытталды. Алдағы уақытта еліміздің дамуы мен тұрақтылығы үшін бірлесіп еңбек етіп, өз үлесімізді қоса білейік. Ел мүддесі үшін еңбек етіп, өз қызметімізге жауапкершілікпен қарайық.
Руслан САЙЛАУБАЕВ,
Б.Момышұлы атындағы орта мектептің директоры,
аудандық мәслихаттың депутаты.
