Ұлыстың Ұлы күні – әз-Наурыз мерекесінде жасалуы тиіс 5 игі іс бар болса, оның бірі – тал егу. Осы ретте бүгін аудан әкімі Марат Сұлтанғалиев бастаған актив құрамы мен аудандық ардагерлер кеңесінің мүшелері және қала тұрғындары аудан орталығындағы «Ұрпақтар аллеясына» жеміс ағашын отырғызды.
Зерлі шапан жабынған, ақ жаулығын тағынған қазыналы қариялар амандық-саулық сұрасып, бірі – шыбық қадап, енді бірі – күрек алып жер қопарып жатты. Көрген көзге мейірім сыйлайтын сыйластыққа толы сәтті қалт жібермей, таспаға жаздық.
«Атадан мал қалғанша, тал қалсын» деп білетін ағайын күрегі мен тырмасын сүйреп орталық алаңда ұйымдастырылған үлкен мерекелік іс-шараға ағылды.
Айта кетейік, өткен жылы аудан аумағында 23 589 түп жасыл желек отырғызылды. Ал биылғы жыл басынан бері 3 мың түп тал егілді.
Сарысу ауданы әкімдігінің баспасөз қызметі
