Азаматтарды қабылдау – полицияға сервистік модельді енгізудің тиімді қадамдарының бірі

Қауіпсіздікті қамтамасыз етудегі полицияның сервистік моделі ол, ең алдымен, тұрғындармен тұрақты негізде байланыс орнату. Сындарлы диалогсыз халықтың құқық қорғау органдарына сенімін арттыру мүмкін емес. Бұл бағыттағы тиімді қадамның бірі азаматтарды қабылдау болып табылады.

Бұл туралы Жамбыл облысы Полиция департаментінің бастығы полиция генерал-майоры Арманбек Баймурзин өзінің фейсбуктегі парақшасында жазды.

Осы аптада қабылдауға 9 азамат жазылған. Тұрғындар қаладағы қоғамдық тәртіп бойынша ұсыныстары мен жеке мәселелерін айтты.

Байзақ ауданының тұрғыны 2020 жылы орын алған жеті бас жылқы ұрлығы дерегі бойынша келді. 51 жастағы ер адамның айтуынша, мұндай жағдай екінші рет орын алып отыр. Бірінші жолы ол полицияға арыз жазбаған. Екінші рет иесі жоғалған жылқыларды өзі іздеп, таппаған соң полицияға жүгінген. Бұл іс ПД бастығының жеке бақылауында болады.

—        Осы орайда, тұрғындарға қылмысты «ізін суытпай» ашудың маңызды екендігін айтқым келеді. Қылмыс туралы дер кезінде полицияға хабарлау күдіктілерді жедел анықтауға және ұстауға мүмкіндік береді, — деп атап өтті Арманбек Баймурзин.

Ал Тараз қаласының 58 жастағы тұрғыны Абай даңғылы мен Қапал көшелерінің қиылысына жаяу жүргіншілерге арналған тротуар жасауды өтінді. ПД бастығының тапсырмасы бойынша оның бірінші орынбасары аталған аумаққа барып, жағдаймен жеке танысады.

Қабылдау барысында алғыс айтқан азаматтар да болды. Облыс орталығының 70 жастағы тұрғыны учаскелік полиция инспекторларына өз қызметтік міндеттерін адал атқарып, тәуліктің кез-келген уақытында көмек көрсететіндері үшін алғысын білдірді.

Полиция департаментінің бастығы қабылдауға әртүрлі жастағы адамдар мен белсенді азаматтардың келетінін айтты. Мұндай кездесулер барысында өңірдегі ең жиі орын алатын мәселелер белгілі болады. Нәтижесінде, оларды шешу бойынша жүйелі жұмыс құрылады. Жауапты қызметкерлер оған әрбір өтініш бойынша қабылданған шаралар туралы үнемі баяндап отырады.

Азаматтарды қабылдау апта сайын өткізіледі. Жеке қабылдауға 8(7262) 57-58-54 нөмірі бойынша жазылуға болады.