Полиция қызметкерлері 2022 жылдың қаңтар айының басында болған жаппай тәртіпсіздік кезінде ұрланған қарулардың орналасқан жерін анықтау бойынша күн сайын іздестіру жұмыстарын жүргізуде.
Ағымдағы жылдың 14-22 наурызы аралығында Жамбыл облысының аумағында 26 қару, 400-ден астам түрлі калибрлі патрон мен арнайы құралдар табылып, тәркіленді.
Олардың ішінде Калашников автоматтары, карабин, мылтық, травматикалық тапанша, револьвер, Макаров және Кольт тапаншалары, ойық және тегіс ұңғылы мылтықтар бар.
Сондай-ақ, полиция қызметкерлері 7,62 мм, 9 мм калибрлі және травматикалық патрондар, қорғаныс жилеті, каскалар және дүрбі тәркіледі.
Табылған қару-жарақтарға сот-баллистикалық сараптамасы тағайындалды.
Жамбыл облысының Полиция департаменті қарудың, оқ-дәрілердің, арнайы құралдардың орналасқан жері туралы хабарлаған немесе оларды полицияға өз еркімен тапсырған адамның, егер басқа құқық бұзушылықтарға қатысы болмаса, қылмыстық және әкімшілік жауапкершілікке тартылмайтынын ескертеді.
Анонимділікке кепілдік беріледі.
