Биыл «Рухани жаңғыру» бағдарламасы аясында Наурыз мерекесін өңірімізде ауқымды тойлау мақсатында «Рухани керуен» жобасы жүзеге асырылған болатын. Осыған байланысты көне Тараздан бастау алған керуен бірқатар аудандарды араласа, енді міне, көршілес Қордай ауданының зиялы қауым өкілдері мен өнерпаздарынан құралған керуен тобы біздің ауданымызға ат басын бұрды.
Көрікті көш Шу елінің сәлемін алғаннан соң, бұл шара аудан орталығындағы мәдениет үйінде жалғасын тапты. Ұлттық тағамдар күнін ұлықтаған керуен қонақтары түрік, әзірбайжан, кәріс, орыс және күрд ұлт өкілдерінің ұлттық тағамдар көрмесін тамашалап, дәмнен ауыз тиді. Сонымен бірге қол өнер шеберлерінің шығармашылық туындыларынан жасақталған көрме де , қордайлықтардың назарына ұсынылды.
Мерекелік думан бұдан әрі аудандық мәдениет үйінің өнерпаздары мен «Рухани керуен» ұйымдастырған мерекелік концерттік бағдарламаға ұласты.
