twitter.com/ZelenskyyUa
5 наурыздың таңында астаналық журналист Тамара Вааль өзіне Владимир Зеленский хабарласқанын айтып жұртты таңқалдырды. Украина президентінің қоңырауы Ваальдің ұйқысын шайдай ашып жіберген.
Тамара Вааль таңғы сағат төртте өзін шырт ұйқыдан оятқан Украина президенті екеніне сенімді, деп хабарлайды Экспресс К.
«Зеленскийдің қоңыр дауысын басқамен шатастыру мүмкін емес. Бірақ күтпеген жерден телефон шалған президентке қалай жауап берерімді сол сәтте бағамдап үлгермедім. Ұйқым толық ашылғанда ғана телефонның ар жағынан естігенім Украина президентінің алдын ала жазып алынған дыбыстық хабарламасы екені түсінікті болды. Зеленский өз үндеуінде соғысты тоқтатуға шақырды», — деп жазады Тамара Вааль Facebook желісінде.
Наурыздың 5-іне қараған түні президент қоңырау шалған қазақстандықтар саны Тамара Ваальмен шектеліп қалмағанға ұқсайды. ЭК порталының елордадағы қызметкері де Украина басшысының өзіне телефон соққанын айтады.
Бұған дейін Зеленскийдің ресейліктерге де дәл осыған ұқсас хабарлама жібергені белгілі. Өзінің үндеуінде президент ресейліктерден әскери қақтығыста жүрген азаматтарын елге қайтарып алуды сұраған. Мамандар Украина президентінің біздің отандастарымызға хабарласуы Қазақстан мен Ресейдің ұялы байланыс жүйесіндегі деф-кодтарының ұқсас (+7) болуына байланысты екенін айтады.
Бұған дейін ЭК қазақстандық журналистің Киевтегі қазіргі жағдайы туралы материалын жариялаған болатын.
