Бүгін сағат 15:09 шамасында Шу қалалық №15 өрт сөндіру бөліміне Шу қаласындағы Қонаев көшесі, №5 көпқабатты тұрғын үйдің шатырынан өрт шыққаны туралы хабарлама түскен.
Осыған байланысты, қалалық өрт сөндіру бөлімінен 2 өрт сөндіру техникасы, аудандық өрт сөндіру бөлімінен 2 өрт сөндіру техникасы оқиға орнына дер кезінде жетіп, өрттің одан әрі өршіп кетпеуіне тосқауыл қойылды. Өрт сөндірушілер сағат 16:45-те өртті ауыздықтады.
Өрт сөндіру бөліміне хабарлама түскен сәттен бастап, көпқабатты тұрғын үйдегі 130 тұрғын эвакуацияланып, қауіпсіз жерге шығарылды.
Оқиға орнына аудан әкімі Сәкен Арубаев пен орынбасары Серік Сәрсенбеков, қала әкімі Ержан Естияр келіп, тұрғындармен кездесті. Өз кезегінде аудан басшысы тұрғындарды сабырға шақырып, тұрғын үйдің шатыры демеушілер тарапынан ретке келтірілетіндігін жеткізді. Қазіргі таңда полиция бөлімінің 20 қызметкері аталған тұрғын үйдің маңында қауіпсіздік шаралары бойынша жұмыс істеуде. Әзірге өрттің шығу себебі белгісіз. Алдағы уақытта тергеу амалдары жүргізіліп, өрттің нақты себебі анықталатын болады.
Аудан әкімінің баспасөз қызметі!
