Күні кеше «AMANAT» партиясының кезектен тыс XXIII съезі өткені белгілі. Оған Мемлекет басшысы Қасым-Жомарт Кемелұлы Тоқаев қатысып, делегаттарға мемлекет пен қоғамды түбегейлі жаңарту үдерісі басталғанын атап өтті.
Бүгінде «AMANAT» партиясы еліміздегі жүйелі өзгерістерге мейлінше белсене атсалысып келеді. Кейінгі кезде партияда институционалдық тұрғыдан жаңарту жұмыстары жүргізіліп, көптеген өзгерістер орын алды. Президент бұл бағыттағы бастамаларды бәсеңдетпей, жұмысты одан әрі жалғастыру керектігін жеткізді. Әлбетте, бұның барлығы ел игілігі үшін екені сөзсіз.
Сонымен қатар, Қасым-Жомарт Кемелұлы Президент ешбір партияға басымдық бермей, саяси тұрғыдан бейтарап болуы қажет екенін атап өтті. Сол себепті де партияның төрағасы ретіндегі өкілеттігін тоқтатып, партиядан шығатынын жеткізді. Мемлекет басшысының бұл шешіміне тұтас ел тұрғындары қолдау білдіреді деген сенімдемін.
Ел тарихында дәл осындай үлкен бетбұрыстар аз болған жоқ. Оның барлығы да елдің еңсесін тіктеп, жұрттың жағдайын жақсарту мақсатында жасалып жатқаны анық. Біз де өз кезегімізде ел игілігі үшін еңбек етіп, Мемлекет басшысының бастамаларына барынша қолдау білдіретін боламыз.
