Таласта Аққөл, Қызыләуіт және Ақтөбе елді мекендеріне газ құбырларын салу жұмыстары жүргізілуде. 2022-2023 жылдарға өтпелі жобаның құны — 3 млрд. 221 млн. 700 мың теңге. Сол сияқты, Ақкөл, Қызыләуіт, Ақтөбе елді мекендерінің ішкі кварталдық газ тарату желісінің ЖСҚ әзірленіп, келісім-шарт жасалды, бюджеттік өтінім тапсырылды. Майтөбе, Қожағаппар елді мекендерін газдандыруға 444 млн. 444 мың теңге бөлініп, «Билікөл» автоматтандырылған газ тарату станциясының құрылысы жүргізілуде. Мердігер «Арайстроймаркет-2003» ЖШС—гі.
Бұл туралы ӨКҚ баспасөз алаңында аудан әкімі Қанатбек Мәдібек айтты. Ол аудан халқын ауыз сумен қамту шараларына да тоқталды. Қазіргі танда Қайыр, Ақтөбе, Арал елді мекендеріне ауыз су жеткізу үшін мембрандық қондырғы орнатуға және Тұрымқұл, Қожағаппар, Қараой, Сейілбек елді мекендерін ауыз сумен қамтамасыз ету мақсатында ЖСҚ әзірлеуге аудандық бюджеттен 20 000 мың теңге бөлініп, мемлекеттік сатып алу жұмыстары жүргізіліп жатыр.
«Қаратау қаласы бойынша тұрғын үй қорынан көпбалалы аналар мен отбасыларға 25 пәтер сатып алынып, кілттері табысталды. Сонымен қатар, 20 пәтер, яғни, кезек ретімен пәтер алып заңсыз жалға берген және өздері тұрмай бос тұрған пәтерлер әлеуметтік осал топтағы мүгедектерге, толық емес отбасыларға, көп балалы отбасыларға берілді», — деді Қанатбек Қайшыбекұлы.
Спикер жұмыспен қамтудың белсенді шараларына тартудың жылдық жоспары 3 299 адам екенін айтып, әзірге 765 тұрғын екі қолға бір күрек тапқанын айтты. Ал тұрақты ваканттық бос жұмыс орындарына 344 азамат орналасқан. Енді 30 адамды қысқа мерзімді кәсіптік оқытуға 6,871 мың теңге бөлінбек.
Өңірлік коммуникациялар қызметі