Ел Үкіметі халықтың өмір сүру деңгейінің күрт төмендеуіне жол бермеу мақсатында бірқатар нақты шаралар қабылдауда. Бұған дейін инфляция дәлізінің болжамы 4-6 пайыз болса, 1 сәуірден бастап 8-10 пайызға дейін қайта қаралды. Мәселен, 1 қаңтардан бастап ең төменгі күнкөріс деңгейінің немесе айлық есептік көрсеткіштің шамасынан есептелетін жәрдемақылар мен базалық зейнетақының мөлшері 5 пайызға артады.
Бұл туралы Өңірлік коммуникациялар қызметінің баспасөз алаңында Еңбек, әлеуметтік қорғау және көші-қон комитетінің Жамбыл облысы бойынша департаменті басшысының орынбасары Аслан Оразбеков айтты. Ол зейнет жасына дейінгі еңбек өтіліне байланысты берілетін зейнетақы төлемдері инфляцияның болжамды деңгейінен 2 пайызға озып, индекстеліп, оның мөлшері жыл басынан бері 7 пайызға артқанын еске салды. Парламентте қаралып жатқан «2022-2024 жылдарға арналған республикалық бюджет туралы» Заңға өзгерістер мен толықтырулар енгізу туралы» Заңның жобасына сәйкес, 2022 жылғы 1 сәуірден бастап, айлық есептік көрсеткіш 3 180 теңгені, ең төменгі күнкөріс деңгейі 37 389 теңгеге құрамақ.
«Биыл 1 сәуірден бастап барлық зейнетақы алушыларға жасына байланысты және еңбек сіңірген жылдары үшін зейнетақы төленетін зейнетақы мөлшері 4% пайызға артты. Бұл ретте зейнетақының ең төменгі мөлшері 48 032 теңгені құрайтынын да білген жөн. ЕТКД-нің ұлғаюына байланысты мемлекеттік базалық зейнетақы төлемінің ең төмен мөлшері 20 191 теңгені, ең жоғары мөлшері — 37 389 теңгені құрайды. Жаңадан тағайындалатын зейнетақы мөлшерін есептеу үшін ескерілетін ең жоғары табыс 146 280 теңгені құрайтын болады. Мемлекеттік бюджеттен төленетін барлық жәрдемақылар түрі АЕК-ң және ЕТКД-нің ұлғаюымен, 2022 жылғы 1 сәуірден бастап өсті», — деді спикер.
Осылайша, жұмысшыларға зейнетақы мен жәрдемақыны жоғары мөлшерде төлеу мәселесі «2022-2024 жылдарға арналған республикалық бюджет туралы» Заң жобасы күшіне енгеннен кейін жүзеге аспақ. Бұл ретте 1 сәуірден бастап Заңға қол қойылған айға дейінгі өткен төлемдер қайта есептеледі, ал тиісті қосымша төлемдер кезекті зейнетақы немесе жәрдемақы төлеумен жүргізіледі.Өңірлік коммуникациялар қызметі
