8 мамыр күні Атырау облысының Исатай ауданында 11 адам із-түссіз жоғалып кетті. Жоғалғандарды іздестіру шаралары басталды, деп хабарлайды Stan.kz ақпарат агенттігі.
Іздестіру шаралары Аққыстау ауылынан 160 шақырым жердегі Исатай ауданынан басталды.
«Бүгін, 9 мамырда сағат 10:50-де Исатай ауданында бір күн бұрын хабар-ошарсыз кеткен 11 адамды іздестіру қайта жалғасты. «УАЗ» маркалы автокөлігінің жүргізушісі мен 10 жолаушы 8 мамыр күні сағат 14:00-де «Ақмаңдай» учаскесіне бару үшін жолға шыққан. Бұл учаске аудан орталығы – Аққыстау ауылынан 160 км қашықтықта орналасқан. Алайда жолға шыққан адамдар осы уақытқа дейін Аққыстау ауылына оралмағаны анықталды», – деп мәлімдеді департаменттің қоғаммен байланыс тобы.
Жоғалған адамдарды іздестіру жұмыстарына Атырау облыстық төтенше жағдайлар департаментінің 4 қызметкері мен жол талғамайтын «ТРЭКОЛ» техникасы тартылған. Іздестіру іс-шарасына Исатай аудандық полиция бөлімінің 1 қызметкері шықты.
https://stan.kz/atirau-oblisinda-11-adam-iz-tussiz-zhogalip-ketti-364206/
