Ел Президенті Қасым-Жомарт Тоқаев халыққа арнаған өткен жылғы Жолдауында онша ауыр емес қылмыстармен теріс қылық жасағандар үшін оларға жаза тағайындау барысында қоғамдық жұмыстарға тарту жазасын кеңінен қолдануды тапсырған болатын. Жалпы, ҚР Қылмыстық-атқару кодексінің талаптары бойынша сотталғандардың қоғамдық жұмыстарды орындауын бақылауды сотталған адамның тұрғылықты жеріндегі пробация қызметі жүзеге асырады.
Сотталған адамның пробация есебіне алынар кезінде оған қоғамдық жұмыстар түріндегі жазаны өтеудің тәртібі мен шарттары түсіндіріледі. Бұл жұмыстар кезінде жазасын өтеуші жергілікті атқарушы органдар белгілеп берген белгілі бір орындарға тазалық жұмыстарын жүргізіп, көріктенуіне өз үлесін қосуы тиіс. Десе де, қоғамдық жұмыстардан жалтарып, сот үкімімен тағайындалған жаза өтеу тәртібін бұзатындардың да саны азаймай тұр.
Мәселен, жыл басынан бері Меркі аудандық пробация қызметінің есебінен 14 сотталған азамат өткен. Бұл азаматтардың 8-і жазасын өтеп есептен босатылса, 2 сотталған азамат қылмыстық теріс қылығы яғни қоғамдық жұмыстарды орындаудан бас тартқан. Осыған орай, олардың жазасы ҚР ҚК-нің 43-бабының 2-1 бөлігінің 1 тармағына сәйкес қоғамдық жұмыстардың орындалмаған 4 қамаққа алудың бір тәулігі есебімен алмастырылды.
Арайлым САМБЕТОВА,
Меркі аудандық пробация қызметі
