Жамбылдық Ислам есімді 10 жасар бала церебральды сал ауруының жеңіл дәрежесіне шалдыққан. Үш жыл бұрын бастаған ұзақ оңалтудан кейін құрдастарымен бірге инклюзивті білім беру бағдарламасы бойынша Панфилов атындағы №39 мектеп-гимназиясына оқуға барады. ӨКҚ тілшісі оқушыға қонаққа барып, жасөспірімнің бір күні қалай өтетіні туралы тілдесіп көрді.
Балалар жылы аясында Өңірлік коммуникациялар қызметі аймақтағы қызықты оқиғалар туралы, сондай-ақ тағдырлары жанға әсер ететін адамдар жайында хабар беретін жобаны бастады. Бұл – соның алғашқысы. Тараз қаласының мектеп-гимназиясының 4-сынып оқушысы Ислам Ерболат бұрын үй жағдайында оқыған. Қазір мектепке барып, басқа балалармен қатар оқиды. Бұл оқиға оқушының анасын да қуантпай қоймады.
– Мен ұлымның үйде емес, өзімен қатар достар тауып, мектепте оқып жатқанын көргеніме қуаныштымын. Қазір ол сыныптастарының туған күндеріне белсенді қатысады, көптеген балалармен дос. Білесіз бе, бұл оның денсаулығы мен эмоционалды фонына оң әсер етеді, – дейді ерекше баланың анасы.
Сынып жетекшісінің айтуынша, Ислам өте ұқыпты оқушы және математика пәніне ерекше зейін танытады. Гүлсара Тұрсынова Исламды сыныптастарының немесе мектеп қабырғасындағы басқа балалардың ренжіткенін ешқашан байқамағанын айтады.
Жасөспірімнің анасы баласын қоғамдық өмірге бейімдеудегі қорқынышын жеңуде. Бұл бағыттағы алғашқы ісі «Нұр Бала» ҚБ-нен басталған. Қазір олар «Асар» мүгедектігі бар адамдарға арналған оңалту орталығына баруды жалғастыруда. Бала жылқыларды жақсы көретіндіктен, анасы оның қызығушылығын қолдап, Исламды жүйелі түрде иппотерапия сабақтарына әкеледі.
– Бүгінгі таңда Исламның жалпы білім беретін мектепте оқитыны осы жобаның жетістігі дер едім. Біз инклюзивті білім беру туралы жиі айтамыз, бірақ инклюзияны бала кезінен: балабақшалардан, бастауыш сыныптардан бастау керек екенін ұмытып кетеміз. Бала өзінің оңалтуын қарапайым балалармен қарым-қатынас жасай отырып, ерте жастан бастаған кезде, жасөспірімдердің қатыгездігі сияқты проблемалар болмайды. Өйткені, олар күн сайын бір-бірімен достық, жанашырлық байланыста болады. Осылайша көптеген жеткіншектер бір-бірімен жақын дос болып, өз құрдастарының ерекшеліктерін байқамайды, – деп атап өтті «Асар» бірлестігі төрағасының орынбасары Әйгерім Дәулетбаева.
Исламның мектеп қабырғасындағы өмірімін танысып болғаннан кейін біз оның анасымен бірге Мамыр саябағындағы оңалту орталығына бардық. Кейіпкеріміз осындағы шағын ипподромда жаттықтырушының демеуімен атқа мінді. Ислам атқа мінуді қатты ұнатады, бұл оның өзін де, анасын да қатты қуантады. Өйткені ол ұлының осындай сабақтардан көптеген жағымды эмоциялар алатындығын біледі.
Мамандар Ислам Ерболаттың әлеуметтік бейімделуінің жетістіктерін бақылай отырып, Қазақстандағы инклюзивті білім берудің маңыздылығын атап көрсетеді. Ата-аналардан алғашқы қадамдарды жасаудан қорықпауды сұрайды. Ал сіз, оқырман, инклюзияға байланысты қандай қызықты оқиғаларды білесіз?
Өңірлік коммникациялар қызметінің алаңызда #БАЛАЛАРЖЫЛЫ айдарын күнделікті бақылаңыз.
