Тұғыры биік еліміздің ертеңі кемел болуы рухы асқақ, өресі биік білімді де таланты ұрпақ қолында

Сіздерді 1 маусым – Халықаралық балаларды қорғау күнімен шын жүректен құттықтаймын!

Бала – біздің болашағымыз, еліміздің ертеңі.

Биыл 2022 жыл – балалар жылы деп жариялаған Президентіміз Қасым – Жомарт Кемелұлы Тоқаев, бүгінгі егемен ел, тәуелсіз мемлекетімізде балаларға білім мен тәрбие беру, оларды барынша әлеуметтік қорғау — жалпыұлттық міндетіміз деп айтқан болатын.

Балалар жылына орай, Шу ауданы мен Тараз қаласында 2 Оқушылар сарайы, сондай-ақ Тараз қаласында балалар шығармашылық орталығы және аутистік спектрі бұзылған балаларға арналған 300 орындық «Аутизм орталығы» пайдалануға берілді. Жыл соңына дейін Тараз қаласында педагогикалық-медициналық-психологиялық консультация орталығын пайдалануға беру жоспарланып отыр.

Балалардың сапалы білім алуы үшін білім беру ұйымдарының материалдық-техникалық базасы жаңартылып, жаңа білім нысандары соғылуда.

Жасалған жағдайлар нәтижесінде оқушыларымыз халықаралық деңгейдегі олимпиадалар мен ғылыми жарыстарда 43, республикалық деңгейде 139 медальдарды иеленді.

Тұғыры биік еліміздің ертеңі кемел болуы рухы асқақ, өресі биік білімді де таланты ұрпақ қолында.

Жасөрендер мен балдырғандарды бүгінгі мерейлі мерекемен құттықтай отырып, ашық аспан, бейбіт күн, балдай тәтті балалық шақ, барлық армандарының орындалуын тілеймін!