Қант қызылшасын өсіру – елдің азық-түлік қауіпсіздігін қамтамасыз етудегі стратегиялық басты бағыттың бірі. Облыста қант қызылшасын өсіру бойынша 2015 жылдан бері жүйелі жұмыстар жүргізілуде. Жыл сайын мемлекет тарапынан көрсетілетін қолдаулардың нәтижесінде аймақтағы диқандар шетелдік селекциядан жоғары өнімді тұқымдар сатып алуда. Нәтижесінде, соңғы жылдары қант қызылшасының егіс алқабы 800 гектардан 6000 гектарға жетті. Жиналатын өнім көлемі 17,0 мың тоннадан 172,0 мың тоннаға дейін ұлғайды. Ал, тәтті түбірдің орташа өнімділігі 185 центнерден 350 центнерге дейін өсті.
Биылғы жылы облыста 6,1 мың гектарға қант қызылшасы отырғызылып, бүгінгі күні агроқұрлымдар тарапынан күтіп-баптау шаралары атқарылуда. Өңірде тәтті түбір өсірумен 82 шаруа қожалық айналысады. Бұл шаруашылықтарда маусымдық кезеңде 2,5 мыңнан астам адам жұмысқа тартылады.
Жалпы ағымдағы жылы қант қызылшасы өнімінің сатып алу бағасы тоннасына 30,0 мың теңгені құрады. Яғни, қант зауыттары өткізілген өнімнің тоннасына — 15,0 мың теңге төлесе, мемлекет тарапынан — 15,0 мың теңге субсидия төленетін болады.
Жамбыл облысы әкімдігінің ауыл шаруашылығы басқармасы
