Жамбыл облысында жылдың басынан бері суға батуға қатысты 2 оқиға тіркелді. Онда 2 адам қайтыс болды, оның 1-еуі бала. Ал былтырғы шомылу маусымында 4 адам суға батып қаза болған, оның ішінде 2 бала бар. Жүргізілген профилактикалық жұмыстардың арқасында суға бату оқиғасы 3 есеге төмендеді, және қайғылы оқиғалардың бәрі шомылуға рұқсат етілмеген жерлерде орын алған.
Бұл туралы ӨКҚ баспасөз алаңында жергілікті ТЖД азаматтық қорғаныс басқармасының басшысы Руслан Шариев айтты. Ол осы жылы шомылу маусымын қауіпсіз өткізу мақсатында бірқатар жұмыстар атқарылғанын атап өтті. Нақтылай айтқанда, өңірдегі табиғи ресурстар және табиғат пайдалануды реттеу басқармасына 2 коммуналдық жағажайды қосу бойынша ұсыныс берілген. Сонымен қатар, Тараз қаласы және аудан әкімдеріне каркасты бассейн сатып алуға қаражат қарастыру қажеттігі туралы ескертпе хат жолданды.
«Облыс бойынша шомылуға тыйым салынған 86 орын айқындалған. Қазіргі уақытта су айдындарында және әлеуметтік желілерде судағы қауіпсіздікті сақтау мәселелері бойынша нақты жұмыстар толыққанды жүргізілуде. Облыс әкімдігінің білім басқармасы мен бассейн иелері 22 келсімшарт жасады, онда 12 мыңнан астам баланы шомылуға үйрету жоспарлануда. Сонымен қатар, 16 жаппай шомылатын орындардың 2-еуі жедел құтқару жасағымен күзетілуінде», — деді спикер.
Руслан Исмагилұлы «Зербұлақ» қалалық жағажайы жөндеу жұмыстарына байланысты биыл да шомылу маусымында жұмыс істемейтінін ескертті.