Ауданда алғаш рет ұйымдастырылған «Екі жұлдыз» байқауы өз мәресіне жетті. Екі айдан аса уақыттан бері аудандық мәдениет үйінде апта сайын өнерпаздардың тартысты әрі қызыққа толы өнерімен өткен байқауға 18 жұп қатысқан болатын.
«Ел іші – өнер кеніші» деген. Жобаның мақсаты ел ішіндегі өнерпаздарды анықтау, шығармашылық қолдау көрсету. Әншілік қасиеттерін, өнерге деген құштарлығын ояту.
Осы кезеңге дейін үміттерін үкілеп, жүректері лүпілдеп, қатарластарынан оза шауып, әділқазылар тарапынан берілген тапсырмаларды жоғарғы деңгейде орындап шыққан тоғыз жұп байқаудың қорытынды гала-концертінде өз өнерлерін көретті.
Байқаудың қорытынды гала-концертіне аудан әкімі Марат Сұлтанғалиев арнайы қатысып, құттықтау сөз сөйледі.
— Халық даналығында «Өнер – ұлттың жаны», — деген сөз бар. Біздің Сарысу өңірі де – киелі өнердің мекені. Қаншама өнер қайраткерлері, дарынды тұлғалар шыққан өлке. Ән мен күйдің елі. «Екі жұлдыз» байқауы осыны тағы бір дәлелдеді. Осы жобаға қатысқан барлық жұп өздерін жақсы қырынан көрсету үшін бар күштерін салып дайындалды. Өз өнерлерін ортаға салды. Барлығы да жақсы өнер көрсетті деп ойлаймын.
Өнерде де, өмірде де жұлдыздарыңыз жана берсін, — деді аудан басшысы өз сөзінде.
Байқауға қатысушылар бірі үйретуші, бірі үйренуші ретінде жұптасып, осы уақыт аралығында өздерін жан-жақты қырларынан таныту үшін аянып қалған жоқ. Әділқазылар алқасына да бірінен – бірі асып түсіп жатқан өнерпаз жұптардың өнерін бағалау оңайға түспеді.
Байқау қорытындысы бойынша бас жүлдені Мұсаева Мөлдір мен Ермаханова Нұршаш жеңіп алды. Жүлдеді І-ші орынды Дәукенова Жадыра мен Өксікбаева Балнұр қанжығасына байлады. Жүлделі ІІ-орынды Серікбаев Берік пен Жанболатқызы Гүлдана иеленді. Мәреге қатар келген екі жұп Бақытов Әмірғали мен Тоқбанов Самат және Дәуітбеков Дархан мен Қыдырәлиев Бекнұр ІІІ-орындарға ие болды.
Жайылма ауылынан келген жұп Белеев Самат пен Тыныштықбеков Нұржан, жаңатастық Егешов Ерлан мен Шаянбаева Бағила, Өндіріс ауылынан келген Жолмаханов Ағағали мен Нұртанов Асу, аудан орталығынан шалғайда жатқан Қамқалы ауылынан келген Амантаев Қуаныш пен Сқақова Ақбота ынталандыру сыйлықтарына ие болды.
Байқау жеңімпаздарына марапатты аудан әкімі Марат Сұлтанғалиев табыс етті. Жеңімпаздар мен жүлдегерлер арнайы дипломдармен, қаржылай және заттай сыйлықтармен марапатталды.
Сарысу аудан әкімдігі баспасөз қызметі
