Алматы қаласының жүргізушілері мемлекетке 5 миллиард теңге қарыз. Салықшылар мен сот орындаушылар берешегі бар азаматтардың көлігін жаппай тәркілей бастады, деп хабарлайды Stan.kz ақпарат агенттігі “КТК” арнасына сілтеме жасап.
Салықты өтеуден жалтарып жүргендердің тең жартысы қозғалтқыш көлемі жоғары қымбат көлік мініп жүрген қалталы тұрғындар екен. Кейбіреулерінің берешегі, тіпті миллион теңгеден асқан.
Toyota Tundra-ның иесі мемлекетке 1 млн 300 мың теңге берешек. Жол ережесін бұзғаны үшін әкімшілік айыппұлдары да қордаланып қалыпты. Темір тұлпары үшін салықты айып тұрағына жеткізбей-ақ, сол сәтте төлеп тастады. Көлік салығын үш жыл бойы елемей келген жүргізушінің бұдан бөлек 7 машинасы бар екен.
Жалпы, автокөлікке салықты әр жылдың бірінші сәуірінен кешіктірмей төлеу қажет. Алматы қаласы бойынша 600 мың көлік есепте тұрса, оның 60 мыңының салығы уақытылы төленбеген.
Ең қызығы, қарыздан қашып жүргендердің жартысы Bently, Mercedes сынды элиталы маркалы көлік мініп жүрген кәсіпкерлер. Мамандар бүгіннен бастап «Сергек» камералары арқылы салықтан жалтарып жүргендерді жаппай ұстап жатыр.
“Азаматтардың барлығына біз салық хабарламаларын жолдадық. Салықты уақытылы төлеу жөнінде. Алайда олар салық органдарының талабын орындамады. «Қарызсыз қала» атты акция басталды бүгіннен бастап. Бұл акция бір ай өтеді. Осы акцияда рейд өткізіп, борышкерлердің автокөліктері айып тұрақтарына қойылады”, – дейді Алматы қаласы мемлекеттік кірістер департаменті өндірістік емес төлемдер басқармасының басшысы Қуаныш Түменбаев.
https://stan.kz/news-366197/
