Мойынқұм ауданы экономикасының негізгі қозғаушы саласы өнеркәсіп болса, жыл басынан бері 39,8 млрд теңгенің өнімі өндіріліп, өткен жылдың тиісті кезеңімен салыстырғанда 5,5 млрд теңгеге артты. Атап айтқанда, 805 кг алтын, 101 кг күміс, 580 мың тонна цемент, 3 мың тонна гранит, 26 мың тонна көмір, 300 тонна балық және 48 мың тонна барит рудасы өндірілді.
Бұл туралы ӨКҚ баспасөз алаңында Мойынқұм ауданының әкімі Әлихан Балқыбеков айтты. Оның мәліметінше, ағымдағы жылы ауданда 2 ірі жоба іске асады. Оның алғашқысы, Мирный ауылындағы «Turan Industry» ЖШС-нің табиғи тастан қаптау плитасын өндіру жобасы. Құны — 500 млн теңге. Жылдық қуаты — 1 170,0 млн теңгенің өнімін өндіру. Екіншісі, Мыңарал ауылындағы «Satellite GS» ЖШС-нің құрамында алтыны бар кен өндіру жобасы. Құны — 500 млн теңге. Жылдық қуаты – 900 млн теңгенің өнімін өндіру
«Бұл жобалардың жүзеге асуы өнеркәсіп өнімінің жылдық көлемін 2,1 млрд теңгеге арттыруға ықпалын тигізетін болады. Нәтижесінде өнеркәсіп өндірісінің көлемі жыл қорытындысымен 91,7 млрд теңгені құрап, нақты көлем индексі өткен жылмен салыстырғанда 8,9 %-ға артатын болады. Ауданда екінші экономикалық сала — ауыл шаруашылығы. Есепті кезеңде 2,4 млрд теңгенің өнімі өндірілді», — деді әкім.
Әлихан Әбіләшұлы мал шаруашылығы саласында барлық төрт түлік мал басында өсім қалыптасқанын жеткізді. Мүйізді ірі қара мал саны 53 310 басты құрап, 10,2 %-ға, қой және ешкі саны 195 811 басты құрап, 2,5 %-ға, жылқы саны 9991 басты құрап, 9,4 %-ға, құс саны 26 640 басты құрап 0,1 %-ға артты.