Агенттік қаржылық қызметтерді тұтынушылардың құқықтарын қорғау шеңберінде 2021 жылғы 7 қазанда заңсыз қызмет белгілері бар және азаматтардың шағымдары түскен ұйымдардың тізімін жариялады.
Агенттік «indigo24.kz» сайтының қаржы пирамидасының белгілері бар ұйымға ешқандай қатысы жоқ екенін және бұл тізімге кірмейтінін хабарлайды.
Тізімге қызметінде қаржы пирамидасының белгілері анықталған субъектілер, сондай-ақ ҚР аумағында қаржылық қызметтерді дербес және (немесе) делдалдарды тарта отырып, тиісті лицензиясыз немесе рұқсатсыз және Агенттікке азаматтардың шағымдары келіп түскен тұлғалар енгізілгенін естеріңізге саламыз.
Тізімдегі субъектілердің қызметі қаржылық лицензиялау және реттеу аясынан тыс, тиісінше клиенттердің оларға көрсетілетін қаржылық қызметтер бойынша құқықтары заңнамалық тұрғыдан қорғалмаған. Осыған байланысты, Агенттіктің тізімінде көрсетілген тұлғалармен қаржылық операциялар жасау Қазақстан Республикасының азаматтары үшін салынған қаражатынан айырылудың жоғары тәуекелдеріне алып келуі мүмкін.
Агенттік қаржы нарығындағы заңсыз қызмет белгілері бар қатысушыларды:
-
интернеттегі ақпараттық кеңістікті мониторингтеу;
-
блогтар, форумдар, бейнехостингтер және мессенджерлер арқылы әлеуметтік желілерді мониторингтеу;
-
жеке және заңды тұлғалардың өтініштері арқылы;
-
мемлекеттік органдармен және азаматтық қоғам институттарының мүддесін білдіретін қоғамдық ұйымдармен өзара іс-қимыл шеңберінде анықтайды.
Неғұрлым тиімді хабардар болу үшін Агенттік қаржы нарығының барлық субъектілерін күдікті компаниялар туралы хабардар етеді, сондай-ақ мұндай компаниялардың сайттарын бұдан әрі тексеру және бұғаттау үшін құқық қорғау және басқа да уәкілетті органдармен өзара іс-қимыл жасайды.
Заңсыз қызмет белгілері бар әр компания бойынша сайттың атауы, мекенжайы көрсетілген. Бұдан кейін ақпарат үнемі жаңартылып отырады.
Заңсыз қызмет белгілері бар ұйымдардың тізімімен осы жерде танысуға болады.
Агенттік қаржы пирамидаларының мынадай негізгі белгілері туралы еске салады:
-
Тартқан клиенттер үшін сыйақы;
-
Нарық деңгейінен бірнеше есеге асатын жоғары кірістілікке кепілдік беру;
-
Қажетті лицензиялардың болмауы;
-
Меншікті негізгі қаражаттың, басқа да қымбат активтердің болмауы;
-
Ресімдеу, оқу, акциялар және т.б. үшін кіріс жарнасының болуы;
-
Ұйым қызметінің нақты анықтамасының болмауы;
-
Төлемдерді тек қолма-қол ақшамен не «жеке менеджерге» аударым жасау арқылы қабылдау.
