Қуаншылық қыспаққа алғанда ағын су «алтыннан» қымбаттай көрінді. Шаруалар өткен жылы «жер-анаға» төккен маңдай терін ақтай алмады. Биыл Құдай қарасып ерте көктем жауынын аямады. Шаруалар астық дақылдарын мол өнім алса, көпжылдық шөп — жоңыршқаның екінші орымына орақ салып үлгерді. Дегенмен Жаратқанның жаңбырына да иек артып, қол қусырып отыра бергенде болмайды.
Асыраушы сала — ауылшаруашылықты жетік меңгерген аудан әкімі Ерлан Қыдыралыұлы Кеңес үкіметі тұсында қазылған ұңғымаларға толық зерделеу жүргізіп, жарамдыларын кәдеге, жарамсызын жөндеуден өткізуге кірісті.
Бүгінде аудан көлемінде 30 ұңғыма қазу жоспарланса, оның бүгінде 22-сі қазылып, іске қосылды. Жұмыстар мәреге жетсе, 800 гектар алқапқа тіршілік нәрі жеткізілмек.
Жеке шаруалар өз қаражаты есебінен ұңғыманы қазып, инфрақұрылымын жүргізер болса, жұмсалған қаражаттың 50 пайызын Үкімет өтеп бермек.
Ал Ащыбұлақ ауылындағы мына ұңғыма толықтай тазартылып, жаңбырдан бөлек суландырылмаған алқапқа, егін су жеткізіп отыр. Дегенмен жерасты суларын да тиімді пайдалану үшін жаңбырлатып, тамшылатып суару әдісін қолдану қажеттігін естен шығармаған жөн болар. Бұл жөнінде өңір басшысы технологияларды қолдану, яғни сатып алу үшін қажетті жаңбырлатып суару техникаларын лизингке «Атамекен» микро қаржы ұйымы арқылы алуға болатынын да меңзеп отыр.
Өтініштер Аса ауылы, Абай көшесі №26, «Атамекен» Жамбыл аудандық филиалында қабылданады.
