Тараз шаһарын Дүниежүзілік қолөнершілер қалалары тізіміне енгізудегі басты мақсат – өңірдің әлемге танылу деңгейі мен туристік имиджін көтеру, отандық қолөнершілер қауымын халықаралық деңгейде таныту, бәсекелестікке төтеп беру және жоғалып бара жатқан қолөнер түрлерін сақтап қалу. Қазақстанға танымал шеберлер мен қолөнер әлеміне енді қадам басқан жас мамандардың таланты мен талғамына қолдау көрсету. Сарапшылардың пікірінше, Тараздың тізімге енуге мүмкінлігі мол. Бұл туралы ӨКҚ баспасөз алаңында спикерлер атап айтты.
Дүниежүзілік қолөнер кеңесі (ДҚК) – бұл коммерциялық емес, үкіметтік емес ұйым, ол 1964 жылы серіктестік қатынасты дамыту, қолөнерге байланысты іс-шаралар арқылы экономикалық дамуға ықпал ету, семинарлар, конференциялар мен көрмелер ұйымдастыру және жалпы алғанда әлем шеберлеріне кеңес беру және көмек көрсету мақсатында құрылған. Ұйым қазір Бельгияда ресми түрде халықаралық ұйым ретінде тіркелген. ДҚК Азия-Тынық мұхитында, Еуропада, Африкада, Латын Америкасында және Солтүстік Америкада, бес аймақта ұйымдастырылған. Ұйым ЮНЕСКО-да аффилирленген.
Дүниежүзілік қолөнершілер қалаларының тізімі 2014 жылдан бері құрылуда. Бүгінгі таңда бұл тізімге дүниежүзінің 55 қаласы енген. Бұл тізімге Қазақстаннан әзірге бір шаһар енбеген.
Қолөнершілер қалалары тізіміне Өзбекстан Республикасының Самарқан, Бұхара, Хиуа, Қоқан қалалары енгізіліп, бүгінгі таңда Үргенч қаласы осы тізімге қосылуға өтініш беріп отыр. Қырғызстан Республикасының Нарын қаласы да осы тізімге енгізілген.
Бүгінгі таңда, осындай орасан зор туристік әлеуеті бар, тасын түртсе тарихы көрінетін Тараз шаһары Дүниежүзілік қолөнершілер қалалары тізіміне ену мәртебесіне лайықты түрде ие болып отыр.