Қарағанды облысының экс-депутатының ұлы екі адамды қағып өлтіргені үшін 9 жылға сотталды
Кәсіпкер, Қарағанды облыстық мәслихатының экс-депутаты Даниил Боровиковтың ұлы жол ережесін бұзуы абайсызда екі адамның өліміне әкеп соқтырды деп айыпталып, 9 жылға бас бостандығынан айырылды. Теміртау қалалық соты үкім шығарды, деп хабарлайды Stan.kz ақпарат агенттігі.
Теміртау қалалық сотының судьясы Даниил Боровиковтың кінәсі дәлелденгенін мәлімдеді.
«Сот сотталушыны кінәлі деп танып, 9 жылға бас бостандығынан айыру жазасын ең төменгі қауіпсіздіктегі қылмыстық-атқару жүйесінде өтеу туралы үкім шығарды. Сондай-ақ сот оны 7 жылға көлік құралдарын басқару құқығынан айырды», – деп хабарлады Теміртау қалалық соты.
Сот сотталушыдан жәбірленушілердің пайдасына жалпы сомасы 27 миллион теңгеден астам моральдық және материалдық шығынды өндірді. Сондай-ақ сот жол-көлік оқиғасы бойынша сотқа дейінгі тергеп-тексеруді жүргізген полиция қызметкерлеріне және сотталушының адвокаттарына қатысты екі жеке ұйғарым шығарды.
Еске салсақ, 2020 жылдың 11 желтоқсанында саяжай бағытындағы жолда Ford және Kia Rio көліктерінің қатысуымен жол апаты орын алған болатын. Kia жүргізушісі 66 жастағы зейнеткер Владимир Крутько мен оның 6 жасар немересі Арина Борзилова оқиға орнында қайтыс болды.
Тергеудің мәліметінше, сотталушы қарсы жолаққа шығып кетіп, көлікпен соқтығысқан.
Бұл ретте жолды қардан тазаламағаны үшін жол компаниясына айыппұл салынды. Ал апаттан кейін ғана ол жерде қауіпті бұрылыс белгісі орнатылды.
https://stan.kz/karagandi-oblisinin-eks-deputatinin-yli-eki-adamdi-kagi-368251/
