Қазақстан Ресейдің орнына Еуразия даму банкінде бақылау пакетіне ие болуы мүмкін – БАҚ

Ресей санкцияға ілікпеуі үшін Еуразия даму банкіндегі үлесін азайтуды көздеп отыр. Сәйкесінше банктегі бақылау Қазақстанға өтуі мүмкін. Бұл туралы Stan.kz ақпарат агенттігі Коммерсантъ басылымына сілтеме жасап хабарлайды.

Bloomberg мәліметіне сәйкес Ресей мен Беларусь Еуразия даму банкі капиталындағы үлесін 50%-дан төмендетпекші. Алайда банктің баспасөз қызметі пікір білдіруден бас тартқан. Сонымен қатар Қазақстан мен Ресейдің қаржы министрліктері де түсінік бермеген.

Еуразия даму банкіндегі елдер батыс елдерінің Ресейге енгізген санкцияларын қолдамаған. Алайда Қазақстанның қаржы министрлігі шілдеде санкцияға байланысты жеке тауар түрлерінің Ресейге жеткізуді шектейтін бұйрықтың жобасын жариялады. Сонымен қатар Қазақстан Еуроодақпен серіктестікті дамытуды қолға алған.

Еуразия даму банкі – мүше елдердің экономикалық дамуына жәрдемдесу үшін құрылған халықаралық ұйым. Оның құрамында Армения, Беларусь, Қазақстан, Қырғызстан, Ресей мен Тәжікстан бар. Банктің жарғылық капиталының 66%-ы Ресейге, 33%-ы Қазақстан, Беларуське 1%-ы тиесілі. Ал өзге елдердің үлесі бұдан да төмен.

https://stan.kz/kazakstan-reseydin-ornina-euraziya-damu-bankinde-bakila-368688/